-
O Compos superou por 3-2 ao Lugo B na casa, nun partido de goles, e segue no máis alto da táboa
Santiago de Compostela, 19 de outubro de 2025
Suma e segue o Compos na casa. Nova vitoria no Vero Boquete, tres novos puntos e o equipo segue no máis alto da clasificación. Fíxoo nun partido de goles, no que superou por 3-2 ao Lugo B.
Na primeira parte, a través da solidez atrás, o Compos foi crecendo e acabouse atopando o gol nos compases finais. Primeiro, pasada a media hora de partido, cunha cabezada de Armental, no segundo pau, tras un gran centro de Diego Rodríguez. Primeiro gol do extremo na Liga e primeiro da tarde tamén.
E xa no desconto, Maceira ampliou a vantaxe, tras gañar a acción aos defensas e definir á perfección na área, mandándoa á rede ao segundo intento. 2-0 e descanso.
Á volta dos vestiarios, o Compos seguiu a por máis e acabou atopando o premio do 3-0 tras un penalti cometido sobre Goris. Encargouse Parapar de lanzalo, como o domingo pasado, e volveu marcar. 3-0 aos 65 minutos nun partido de goles que os nosos tiñan onde querían.
O partido parecía encarrilado, pero o Lugo B meteuse nel cun tanto de Samu. E nos compases finais, máis aínda, tras transformar Ibe un penalti. 3-2.
Con todo, o Compos soubo aguantar e a vitoria, unha máis, quedou na casa. Tres puntos importantes, nun partido de goles, para seguir encabezando a táboa clasificatoria. A próxima fin de semana, novo reto coa visita ao Alondras.
FICHA TÉCNICA
3 – SD COMPOSTELA: Álex Cobo; Diego Rodríguez, Mateo, Pablo Crespo, Damián Noya; Diego Uzal, Goris (Quico, min.82); Parapar (J. Cañizares, min.67), Antón Guisande (Porrúa, min.18), Adrián Armental (Trasi, min.67); e Maceira (Carlos López, min.67).
2 – CD LUGO B: Mateo Suárez; Noah (Fran, min.79), Diaz, Tomás, Marcos (Vini, min.68); Nico, García (Tirado, min.68); Samu (Samu Rozas, min.79), Mateo (Arao, min.68), Aday; e Ibe.
GOLES: 1-0: Adrián Armental, min.36; 2-0: Maceira, min.45+1; 3-0: Parapar, min.66; 3-1: Samu, mi.68; 3-2: Ibe (p.), min.84.
ÁRBITRO: Sergio Espasandín (A Coruña). Amoestou a Adrián Armental, Pablo Crespo e Álex Cobo, polo Compos; e a Noah e Mateo, polo Lugo B.
INCIDENCIAS: Estadio Vero Boquete de San Lázaro (Santiago de Compostela). Xornada 7 do Grupo 1 da Terceira RFEF disputado ante 1.110 espectadores. Antes do inicio, a Peña Fonte Sequelo, que cumpriu o seu 25 aniversario, realizou o saque de honra.
