-
O Compos goleou na casa e márchase ao parón de Nadal líder e invicto
Santiago de Compostela, 20 de decembro de 2025
O Compos pechou o ano cunha nova vitoria na casa. Un partido dominado de principio a fin para selar un mes de decembro perfecto, con tres vitorias en tres partidos e con 0 goles encaixados. E marchouse ás vacacións de Nadal co triunfo máis avultado da tempada, 3-0, contra o Somozas.
Baixo un intenso diluvio durante os 90 minutos, o Compos soubo dominar os tempos do encontro e acabar levándose o gato á auga.
Na primeira parte, acumulando moita posesión, atopou o gol na cabeza, unha vez máis, de Maceira. O pichichi do Compos, que suma xa oito goles na Liga, apareceu na área para mandar á rede un gran centro de Valín.
Diana coa que se chegaría ao descanso, aínda que ben puido caer outra máis, nun novo centro do lateral, pero Antón Guisande, que se adiantou ao porteiro, non acertou coa portería.
Á volta dos vestiarios, de novo Guisande, adiantaríase ao porteiro visitante, pero esta vez con mellor premio. Falta no borde da área e vermella directa para Iago. Cun máis, o Compos foi aínda máis dominador e acabou selando o triunfo.
Pasada a hora de partido, Armental subiu por banda dereita e puxo un centro medido para que Parapar, chegando en carreira, a empurrase á rede. O seu terceiro tanto da campaña.
E no 75, Cañi puxo a guinda cun golazo entrando por banda. O atacante púxoa na escuadra contraria, imposible para o porteiro, para volver marcar en Liga.
Co 3-0 final pechouse unha gran vitoria no Vero Boquete no último partido do 2025. Tres puntos cruciais para encarar o Nadal no liderado e invictos.
FICHA TÉCNICA
3 – SD COMPOSTELA: Álex Cobo; Valín, Pablo Crespo, Damián Noya; Diego Uzal (Zubanovic, min.79), Samu, Goris (Mateo, min.65); Parapar (Porrúa, min.79), Antón Guisande, Armental (J. Cañizares, min.65); e Maceira (Carlos López, min.71).
0 – UD SOMOZAS: Iago; Ivi, Dopico (Óscar, min.66), Joel, Asier; Sanmartín, Bruno (Kike, min.71); Aldán, Cambón (Pérez, min.66), Iñaki (Adrián, min.53); e Lucas Fanego (Xuco, min.71).
GOLES: 1-0: Maceira, min.25; 2-0: Parapar, min.64; 3-0: J. Cañizares, min.75.
ÁRBITRO: Alejandro Castro (A Coruña). Expulsou a Iago (min.52) con vermella directa. Ademais, amoestou a Secho (banco) e a Goris, polo Compos; e a Cambón, polo Somozas.
INCIDENCIAS: Estadio Vero Boquete de San Lázaro (Santiago de Compostela). Xornada 15 do Grupo 1 da Terceira RFEF disputado ante 721 espectadores.
