-
O mediocentro David Rosón chega do CD Lugo e firma ata final tempada, con opción a unha máis
Santiago de Compostela, 13 de xaneiro de 2026
David Rosón Fernández (Lugo, 22/05/2003) é novo xogador da SD Compostela. O mediocentro chega procedente do CD Lugo, equipo ao que estivo vinculado desde os 12 anos, e firma ata final de tempada con opción a unha máis.
Coa incorporación de David Rosón, o Compos faise cos servizos dun mediocampista cun gran despregamento físico e con capacidade para a asociación. Un “8”, aínda que tamén pode actuar na base da xogada, con moi bo pé e que, a pesar da súa mocidade, conta xa cunha notable experiencia no fútbol galego e nacional.
Nesta primeira volta da tempada, o futbolista lucense estivo nas filas do Club Deportivo Lugo, na Primeira Federación, participando nun partido de Liga. Foi o seu último servizo no club da súa vida, ao que chegou con 12 anos e no que foi escalando etapas e categorías ata chegar ao primeiro equipo.
Co filial lucense debutou como sénior na campaña 2022/23, con 19 anos, na Segunda Federación, nun ano no que foi titular indiscutible, disputando 33 partidos, nos que ademais marcou 2 goles. Rol que mantivo ao seguinte curso, na Terceira RFEF, con 32 encontros e 3 tantos. Este gran rendemento abriulle as portas do primeiro equipo, debutando en Primeira RFEF e participando en 2 duelos.
A esta ampla traxectoria na canteira lucense, hai que engadirlle tamén unha cesión ao Don Benito, a pasada tempada, na que sería protagonista en Segunda Federación, con 26 partidos disputados, 2 goles anotados e 3 asistencias repartidas.
Agora, David Rosón chega ao Compos co obxectivo de volver recuperar o seu mellor fútbol sobre o verde. Con esa ilusión, e co obxectivo de axudar ao equipo a lograr o ascenso, súmase hoxe aos adestramentos e, se o corpo técnico o considera, estará dispoñible para debutar este domingo no Vero Boquete.
Benvido, Rosón!
