-
O Compos estreou o 2026 cun novo triunfo, con dobrete de Antón Guisande e repetindo portería a cero
Santiago de Compostela, 10 de xaneiro de 2026
A SD Compostela comezou o ano 2026 igual que terminou o pasado, con vitoria e portería a cero. Os nosos encadearon o seu cuarto triunfo consecutivo, todos eles sen encaixar gol, tras superar por 0-2 ao Estradense. Tres puntos de moito valor que permiten aos branquiazuis seguir invictos e sólidos no liderado.
Na difícil saída á Estrada, o Compos demostrou unha gran solidez, especialmente no primeiro tempo. Durante 45 minutos freou ao rival, sen conceder nada atrás e sendo resolutivo en área contraria.
Así, aos 17 minutos, adiantouse no marcador. Tras un gran caneo de Parapar por banda, Antón Guisande metía a bota para mandar á rede o centro do extremo coruñés. 0-1. E antes do intermedio puido caer o segundo, pero Ale sacou un gran pé sobre a liña para despexar o tiro de Pablo Crespo desde a área pequena.
A segunda metade comezou igual que a primeira, con outra clara ocasión de Pablo Crespo, a balón parado, desbaratada polo porteiro local. Con todo, o Estradense deu un paso adiante e estivo máis próximo ao gol, aínda que a defensa e Álex Cobo, moi seguro, rexeitaron calquera perigo.
Non marcaron os locais, pero si o fixeron os nosos, xa no desconto, para sentenciar o choque. E foi de novo Antón Guisande , quen se desmarcou ao espazo para recibir a asistencia de Cañi e bater entre as pernas ao porteiro, selando a vitoria e o seu cuarto gol na tempada.
0-2 final que permite ao Compos seguir sólido no liderado. O vindeiro domingo, os nosos buscarán pechar a primeira volta invictos e sumar o quinto triunfo consecutivo contra o Viveiro no Vero Boquete.
FICHA TÉCNICA
0 – CD ESTRADENSE: Ale; Sergio, Caraban, Landeira, Ander, Óscar (Miguel, min.37); Padín (Hugo, min.89), Raúl, Brais Vidal, Gerard (Álex Delgado, min.64); e Pedrosa.
2 – SD COMPOSTELA: Álex Cobo; Valín, Diego Uzal, Pablo Crespo, Damián Noya; Samu (Quico, min.80), Goris (Carlos López, min.80); Parapar (J. Cañizares, min.66), Antón Guisande, Adrián Armental (Mateo, min.66); e Maceira (Aarón Martínez, min.89).
GOLES: 0-1: Antón Guisande , min.17; 0-2: Antón Guisande, min.90+2.
ÁRBITRO: Juan Luís Davila (Vigo). Amoestou a Miguel, polo Estradense; e a Parapar, Mateo e Valín, polo Compos.
INCIDENCIAS: Novo Campo Municipal A Estrada (A Estrada). Xornada 16 de Liga do Grupo 1 da Terceira RFEF. Ambientazo nas bancadas, con gran presenza de afeccionados chegados desde Santiago de Compostela.
