-
Os nosos perderon 2-1 en A Grela tras conseguir igualar a contenda co tanto de Cañi
A Coruña, 22 de febreiro de 2026
O Compos perdeu 2-1 na súa visita ao campo de A Grela e segue sen conseguir encadear vitorias nesta segunda volta. Os nosos caeron no seu enfrontamento contra o Silva, nun partido que comezou da peor maneira, que conseguiron igualar, pero no que volveron encaixar tras lograr o máis difícil.
Nun campo como A Grela, de dimensións reducidas, as xogadas de estratexia xogan un papel crucial e os locais souberon aproveitalo no comezo do duelo. Un saque de banda, rexeitado pola defensa, foi cazado no pico da área por Hugo Baldomar e o seu disparo, tras pegar nun dos nosos, envelenouse cara á rede.
Con falta de espazos, ao Compos custoulle, aínda que tivo a súa, pasada a media hora, nunha boa acción elaborada, pero Armental, cando ía tirar, foi cargado por un defensa, evitando o seu disparo. Ademais, o colexio tampouco sinalou infracción. Así, chegouse ao descanso con vantaxe local, 1-0.
Na segunda parte, os nosos saíron cun impulso diferente, conscientes da importancia de mover rápido a pelota e aí apareceron os espazos. O Compos xogaba en campo contrario e atopou o premio, tamén, nun saque de banda, no que Diego Uzal foi trabado por un defensa, penalti. Cañi encargouse de executalo e marcalo, 1-1.
Logrando o máis difícil, o Compos foise a polo triunfo e tívoo de novo nas botas de Cañi, pero o seu disparo desde dentro da área, co porteiro superado, sacouno baixo paus un defensa.
Con todo, o Silva, que levaba minutos sen saír de campo propio, puido despregarse nunha contra, tras unha posible falta, que acabou en córner. E desde a esquina, Rodri Alonso adiantouse a todos, marcando o 2-1 no primeiro pau.
De aí ao final, foi un querer e non poder. Con constantes centros á área que foron rexeitados polo porteiro ou que se marcharon fóra por moi pouco. Polo tanto, o resultado xa non se moveu e o Compos non puido sumar puntos en A Grela, nun duelo no que se estreou, e como titular, Riki Mangana.
Tras esta derrota, o Compos buscará resarcirse este próximo sábado, na xornada aprazada polo mal tempo, contra o Cambados. O partido disputarase ás 17:00 horas en Burgáns.
FICHA TÉCNICA
SD COMPOSTELA: Álex Cobo; Diego Rodríguez (David Rosón, min.58), Riki Mangana, Pablo Crespo, Aarón Martínez (Charly, min.58); Deiego Uzal, Unai; Armental (Samu, min.72), Antón Guisande, Cañi; e Maceira.
SILVA SD: Bugy; Álvaro Rey, Bili, Nico Rosas, Seydi, Parafita; Carletto, Hugo Baldomar (Coba, min.72), Carro (Montero, min.63); Iago (Adri Vázquez, min.90+1) e João Paulo (Rodri Alonso, min.63).
GOLES: 1-0: Hugo Baldomar, min.7; 1-1: Cañi (p.), min.69; 2-1: Rodri Alonso, min.76.
ÁRBITRO: Adrián Estévez (Ourense). Amoestou a Nico Rosas e Parafita, polo Silva; e a Secho e Bruno (ambos no banco), polo Compos.
INCIDENCIAS: Campo Municipal de A Grela (A Coruña). Xornada 22 de Liga do Grupo 1 da Terceira RFEF disputado ante medio milleiro de espectadores. Gran presenza de afeccionados da SD Compostela nas bancadas.
