-
Os nosos venceron 0-1, con gol de Damián, pero foi insuficiente e terán que buscar o ascenso no playoff
Viveiro, 10 de maio de 2026
O Compos gañou en Viveiro, o seu primeiro obxectivo nesta última xornada, pero non atopou o resultado desexado en Vilagarcía e terá que xogar o playoff. Os nosos gañaron con gol de Damián Noya, pero foi insuficiente para chegar á primeira praza. Agora, por diante, unha fase para buscar o mesmo obxectivo: o ascenso.
Saltou o Compos a Cantarrana coa firme intención de gañar e esperar un fallo do líder. Con esa premisa clara, os nosos comezaron con forza, dominando o esférico e buscando o arco rival.
Así, nunha acción a balón parado, pasado o cuarto de hora, chegou o primeiro gol. Colgou a falta Cañi e Damián Noya adiantouse a toda a defensa e ao porteiro para meter a cabeza e mandar a pelota á rede. 0-1.
Con vantaxe no marcador, o Compos seguiu buscando o arco rival, aínda que sen exporse atrás, tendo as súas opcións. Primeiro foi Armental, tras unha gran acción individual, o que mandou o esférico ao lateral da portería. E despois, nunha falta desde a frontal, tívoa Parapar, pero Ayoub sacou o balón a córner con apuros. Así, chegouse ao intermedio coa vantaxe mínima compostelanista.
Á volta dos vestiarios, o partido seguiu polo mesmo camiño, cun Compos que dominaba os tempos e que deu un paso máis, buscando o segundo, coa entrada dos cambios.
Damián Noya, ao pau nun remate de córner, e Goris, ao traveseiro tras un rexeite do porteiro, tiveron as máis claras, pero a pelota non entrou.
Sen perigo atrás, chegouse ao final co 0-1, resultado insuficiente porque na Lomba, os locais remontaron e levaron o ascenso. Agora, toca loitar polo salto de categoría nun playoff que comeza a próxima fin de semana. A primeira eliminatoria será contra o Racing Vilalbés.
FICHA TÉCNICA
0 – VIVEIRO CF: Ayoub; Manu, Jacobo (Colucci, min.67), Diego, Diogo, Esquerdeiro; Cora (Carlos, min.80), Rolle, Álvaro; Vicente (Henri, min.59) e Arturo (Lansade, min.46).
1 – SD COMPOSTELA: Álex Cobo; Valín, Quico, Damián Noya, Aarón Martínez (Goris, min.71); Diego Uzal; Armental (Unai, min.60), Parapar (David Rosón, min.89), Antón Guisande, Cañi (Samu, min.71); e Maceira (Charly, min.71).
GOLES: 0-1: Damián Noya, min.16.
ÁRBITRO: Rodrigo García (A Coruña). Amoestou a Esquerdeiro, Arturo, Manu e Diego, polo Viveiro.
INCIDENCIAS: Estadio Municipal Cantarrana Kiko Rey (Viveiro). Xornada 34 de Liga, última de liga, do Grupo 1 da Terceira RFEF. Máis dun centenar de afeccionados desprazáronse ata terras lucenses co equipo.
