O Compos está na final do play off

• Os nosos conseguiron a remontada, 2-1, contra o Arteixo e pasan á seguinte rolda do play off

Santiago de Compostela, 7 de xuño de 2026

O Compos está na final do play off. Os nosos superaron por 2-1 ao Arteixo, obrando a remontada e clasificándose para a última eliminatoria da fase de ascenso. Nunha gran tarde de fútbol, os goles de Armental e Charly, así como a mellor clasificación na liga regular dos branquiazuis, permiten á SD Compostela superar esta dura eliminatoria. Xa só queda un paso máis.

Coa misión de lograr a remontada, o Compos, apoiado pola bancada, saltou ao Vero Boquete coas premisas claras. Insistir ata que caese o gol. Con máis de 4.000 espectadores, a mellor entrada da tempada, os nosos arrincaron mellor e comezaron a avisar xa nos primeiros minutos.

No 9, probouno Parapar desde a frontal, e dous máis tarde Goris, desde a mesma zona, aínda que en ambas ocasións apareceu Carlos. Foi o preludio do que se viviu ao cuarto de hora.

Primeiro, desde tres cuartos de campo, Armental buscou un disparo espectacular que se estrelou na escuadra, para posteriormente acabar en córner. E na xogada ensaiada, o propio extremo de Ribeira combinou con Parapar, para encarar pola liña de fondo e fusilar a pelota ao fondo da rede. 1-0 e eliminatoria igualada.

Coa igualdade na rolda, o Arteixo quixo sacudirse a presión inicial branquiazul e comezou a mover mellor a pelota, ante un Compos que se repregou con orde, sen perder a mordente arriba en canto podía saír.

Foron minutos de moito control, achegamentos por ambas áreas, pero sen acabar de concretarse en ocasións. Por iso, o tempo foi correndo ata chegar ao intermedio coa citada vantaxe mínima do Compos.

Á volta dos vestiarios, os nosos seguiron co mesmo plan, comezando de novo con aproximacións. Tívoa Antón Guisande, desde a frontal, pero sacouna coa punta dos dedos Carlos, e tentouno Maceira, por dúas veces, pero os seus remates non acabaron no lugar desexado.

Con todo, a pesar de que o Compos tiña controlado o partido, chegou o inesperado. Nunha acción a balón parado ben executada, Agulló cazou á segunda a pelota na área e mandouna de cabeza ao fondo da rede.

De novo os coruñeses estaban por diante na eliminatoria, pero aí saíu a relucir a casta deste Compos, arroupado pola bancada, que non deixou de animar pese ao gol.

Parapar botouse o equipo ás costas e comezou a xerar accións de perigo en busca do segundo da tarde e este acabou chegando no 74. Tras unha boa acción trenzada polo balcón da área, Antón Guisande puxo o pase da morte, Samu rematou de primeiras e a pelota rebotou en Charly para acabar no fondo da rede. 2-1 e de novo todo igualado (3-3).

A pesar de que o empate no global favorecía aos intereses compostelanistas, os nosos seguírono tentando e tiveron o triunfo definitivo, por dúas veces, no desconto, ambas en botas de Samu, pero primeiro, no man a man, non foi quen de superar ao porteiro e despois, tras un disparo desde a frontal, Carlos sacou a pelota coa punta do pé. Así, chegouse á prórroga, na que a vantaxe, pola clasificación na Liga, xa era branquiazul.

No tempo extra, o Compos estaba mellor fisicamente e esa forza permitíalle ter o control da contenda e buscar accións de perigo, sobre todo, nas botas dun Cañi que acababa de entrar.

O extremo probou os reflexos de Carlos, no seu enésimo intento da primeira parte da prórroga e tívoa, sobre todo, no 115, pero perdoou cando o tiña todo a pracer, tralo roubo de balón de Charly ao porteiro.

En todo caso, non fixo falta, porque os nosos despexaron todos os centros á área dos visitantes e acabáronse levando o triunfo, 2-1, que lle permite clasificarse para a seguinte rolda do play off. Agarda o Badolona, do grupo catalán. A próxima semana comeza a finalísima no noso feudo.

FICHA TÉCNICA

2 – SD Compostela: Álex Cobo; Valín (Riki Mangana, min.71), Quico, Pablo Crespo (Charly, min.71), Damián Noya; Diego Uzal, Goris (Unai, min.84); Parapar, Antón Guisande (Aarón Martínez, min.112), Armental (Samu, min.57); e Maceira (Cañi, min.91).

1 – Atlético Arteixo: Carlos; Iván (Iker, min.84), Agulló, Tomé, Manu Berrocal; Álvaro Queijeiro (Marcos Aller, min.51), Pablo Naya; Rubo (Moreta, min.62), Pablo Martínez (Melo, min.62), Jota (David Rojo, min.96); e Otero.

Goles: 1-0: Armental, min.17; 1-1: Agulló, min.63; 2-1: Charly, min.74.

Árbitro: Iván Bastián (Asturias). Expulsou con vermella directa a Secho (min.120), adestrador do Compos; e a Sergio Pereira (min.86), segundo adestrador, e Hevia (min.120), porteiro suplente, polo Arteixo. Ademais, amoestou a Diego Uzal, Charly, Damián Noya, Álex Cobo e Parapar, polo Compos; e a Yelco (preparador físico), Moreta e Manu Berrocal, polo Arteixo.

Incidencias: Estadio Vero Boquete de San Lázaro (Santiago de Compostela). Partido de volta da final autonómica do play off disputado ante 4.082 espectadores.