-
O “Jugador Cinco Estrellas” da Tempada 25/26, Diego Uzal, amplía o seu contrato ata xuño de 2027
Santiago de Compostela, 8 de xullo de 2026
A SD Compostela 26/27 seguirá desfrutando un ano máis da fortaleza de Diego Uzal. O designado pola afección como o “Jugador Cinco Estrellas” da pasada tempada, tras acadar o ascenso, amplía o seu contrato ata xuño de 2027.
Deste xeito, o club asegúrase a continuidade do xogador de campo máis utilizado polo corpo técnico en Terceira Federación, con máis de 3.400 minutos disputados. Así, o Compos de Segunda Federación terá un pulmón sobre o verde e un capitán dentro e fóra do campo.
Na súa primeira campaña na capital galega, Diego Uzal disputou 39 partidos, perdéndose só un encontro en toda a tempada por sanción, alternando a posición de mediocentro e central, sendo fundamental en ambas. Ademais, marcou un gol.
Coa súa renovación, Diego Uzal regresará, como o Compos, á Segunda Federación, categoría que coñece á perfección e na que buscará seguir demostrando a súa fortaleza e gran nivel futbolístico.
