-
O canteirán Manu Rivas regresa ao Compos tras unha campaña no Mérida na Primeira Federación
Santiago de Compostela, 14 de julio de 2026
Manu Rivas (Brión, 09/06/2003) e a SD Compostela volven encontrarse uno ano despois. O canteirán regresa ao Compos para vivir a súa terceira etapa no club. Trala súa tempada no Mérida, na Primeira Federación, regresa para aportar traballo, poderío físico e capacidade ofensiva á banda esquerda. Firma por unha campaña.
Moi coñecido pola afección branquiazul, Manu Rivas é un lateral esquerdo de longo percorrido, intenso e cunha gran capacidade para incorporarse ao ataque. Potente fisicamente e con bo trato de balón, destaca pola súa profundidade por banda e a súa versatilidade, xa que tamén pode actuar en posicións máis adiantadas.
Formado na canteira da SD Compostela, foi crecendo tempada tras tempada, consolidándose como un futbolista con personalidade, compromiso e moito potencial. A súa capacidade para chegar á área rival, xerar perigo desde o carril esquerdo e manter un alto ritmo durante os noventa minutos, como demostrou no seu último ano no Compos, convérteno nun perfil moi completo.
Precisamente, nesa última experiencia en Compostela, Manu Rivas foi un dos xogadores máis destacados da tempada, rozando os 2.000 minutos de xogo, repartidos en 35 partidos, vinte deles coma titular. A pesar de actuar no carril, conseguiu marcar 6 goles e repartiu varias asistencias.
Agora, volve ao club como un futbolista máis maduro, grazas á súa experiencia conseguida co Mérida na Primeira Federación, categoría na que debutou participando en 17 encontros. Ademais, tamén hai que sumarlle a súa traxectoria anterior na Canteira Picheleira, Deportivo Xuvenil, Sigüeiro e Atlético Arteixo.
“Estou moi contento de volver ao Compos para unha tempada ilusionante. Creo que este ano aprendín moito e que podo achegar bastante ao equipo. Teño ganas de comezar e de facer as cousas ben”, sinalou o canteirán nas súas primeiras palabras tras fichar.
Trala súa firma, mañá comezará a pretempada co resto dos seus compañeiros.
¡Benvido, Manu! Moi ledos de terte aquí de novo.
