-
O mediocentro venezolano Ces Cotos conta con ampla experiencia na Segunda Federación e achegará equilibrio, personalidade e bo trato de balón ao equipo
Santiago de Compostela, 21 de xullo de 2026
César Alejandro Rodríguez Cotos (07/03/2000, Barquisimeto -Venezuela-), máis coñecido como Ces Cotos, é novo xogador da SD Compostela para a Tempada 2026/27. O mediocentro venezolano de 26 anos, con amplo coñecemento do fútbol galego, chega procedente do Utebo, da Segunda Federación.
Ces Cotos é un centrocampista dinámico, con percorrido e que destaca pola súa capacidade para ofrecer equilibrio ao equipo, tanto en tarefas defensivas como na construción do xogo. A súa lectura dos espazos, a intensidade na presión ou a intelixencia táctica son algunhas das súas principais virtudes.
Do mesmo xeito, como ven demostrando na súa traxectoria futbolística, conta cun excelente trato do balón e moita personalidade, o que lle permite dar continuidade ao xogo e conectar con facilidade as distintas liñas do equipo.
Todas estas virtudes, así como a súa polivalencia para adaptarse ás diferentes posicións do centro do campo, convérteno nun perfil moi completo.
Ces Cotos chega ao Compos tras unha última tempada e media no Utebo FC, do Grupo 2 da Segunda Federación, xogando a gran nivel. Co conxunto aragonés disputou 34 partidos, nos que marcou 3 goles.
Formado na canteira do Deportivo da Coruña, conta ademais con experiencia en clubs como o Ourense CF, o filial do Club Deportivo Lugo ou o San Sebastián de los Reyes, así como un breve paso polo Olimpiakós Volou do fútbol grego. Cabe destacar ademais que debutou na Segunda División co primeiro equipo lucense, disputando 4 partidos, ao que se engade un máis na Copa do Rei.
Coa súa incorporación, a SD Compostela 26/27 suma un xogador en plena madurez deportiva, preparado para achegar traballo, regularidade e rendemento inmediato no regreso do club á Segunda Federación. Con este obxectivo, mañá súmase aos adestramentos do Compos.
Benvido, Ces Cotos!
