-
Rafa de Vicente, con experiencia na Segunda B e Primeira Federación, aportará creatividade e visión do xogo á medular branquiazul
Santiago de Compostela, 23 de xullo de 2026
A SD Compostela suma experiencia, xerarquía e calidade para o seu centro do campo coa fichaxe de Rafa de Vicente (Málaga, 18/07/1993). O centrocampista malagueño, cunha dilatada traxectoria no fútbol nacional, reforzará a zona medular do equipo branquiazul para esta tempada na Segunda Federación.
Rafa de Vicente é un centrocampista cunha gran intelixencia táctica e que destaca pola súa excelente visión de xogo, criterio na distribución do balón e capacidade para marcar o ritmo dos partidos.
Ademais das súas calidades futbolísticas, sobresae tamén pola súa personalidade, liderado e capacidade para asumir responsabilidades no verde, podendo aportar a súa experiencia e coñecemento futbolístico.
Neste senso, o novo xogador do Compos, formado na canteira do Málaga, desenvolveu gran parte da súa carreira na Segunda División B e Primeira Federación, formando parte de clubs de referencia do fútbol nacional como o Real Murcia, o Recreativo de Huelva, o Real Racing Club de Santander ou o Deportivo da Coruña.
A todos eles, hai que sumar tamén experiencias máis recentes no San Sebastián de los Reyes, no Marbella FC, onde coincidiu co noso adestrador Carlos de Lerma; no San Fernando e no La Unión Atlético, último club polo que pasou.
Ao longo da súa traxectoria disputou 249 encontros, repartidos en 11 tempadas, entre a antiga Segunda B, Primeira e Segunda Federación, sendo protagonista en varios proxectos que loitaron polo ascenso, incluídos os acadados co Racing e o Marbella.
Deste modo, coa súa incorporación, a SD Compostela suma un futbolista contrastado, preparado para liderar o centro do campo e achegar a xerarquía necesaria nunha tempada tan esixente como ilusionante.
Para facelo posible, hoxe xa se incorporou aos adestramentos do equipo, nesta segunda semana da pretempada.
Benvido, Rafa de Vicente!
