-
Dani González, con ampla experiencia na categoría, chega do Arenteiro, da Primeira Federación
Santiago de Compostela, 27 de xullo de 2026
A SD Compostela continúa reforzando o seu plantel coa incorporación de Dani González García (Reinosa -Cantabria-, 29/01/2002). O centrocampista cántabro, con ampla experiencia na categoría, chega do Arenteiro, da Primeira Federación, e únese ao proxecto branquiazul para a Tempada 2026/27.
Dani González é un centrocampista dinámico, con bo trato de balón, percorrido e capacidade para interpretar diferentes rexistros do xogo. Ademais, destaca polo seu compromiso, a súa intensidade sen balón e a súa facilidade para incorporarse ao ataque desde segunda liña. Estas características permítenlle tamén adaptarse a varias posicións na medular.
Formado nas categorías inferiores do Real Racing Club, deu o salto ao fútbol sénior co seu filial, o Raio Cantabria, onde se consolidou como unha das súas pezas máis salientables, disputando 149 encontros en cinco campañas, nas que anotou ademais 28 goles. Especialmente destacable foi a última delas, na que xogou 34 encontros, 33 deles coma titular, nos que marcou 11 goles e repartiu 6 asistencias. Cabe destacar tamén que participou en 4 partidos co primeiro equipo racinguista.
Finalizada a súa etapa en Cantabria, o seu rendemento abriulle as portas do CD Arenteiro, co que competiu a pasada campaña na Primeira Federación, disputando 32 partidos oficiais, 30 de liga, nunha categoría de máxima esixencia. Unha experiencia que lle permitiu seguir crecendo como futbolista e adquirir unha importante madurez competitiva.
Coa súa chegada, a SD Compostela incorpora mocidade, calidade, intelixencia táctica e experiencia na categoría a un proxecto que segue tomando forma, co obxectivo de afrontar a nova tempada coa máxima ambición.
Benvido á túa nova casa, Dani!
