-
Iago Domínguez volve ao Compos tras unha gran tempada defendendo a portería da UD Somozas
Santiago de Compostela, 1 de setembro de 2026
Iago Domínguez (Vigo, 22/11/2001) está de volta na SD Compostela. O porteiro vigués regresa á disciplina branquiazul despois dunha tempada defendendo a gran nivel a meta da UD Somozas. Un gardaredes moi completo, con experiencia e categoría, para completar a portería do Compos 26/27.
Aos seus 24 anos, Iago Domínguez firma co obxectivo de achegar o seu traballo, compromiso e rendemento baixo paus ao proxecto branquiazul. Unhas calidades, tanto de reflexos como na saída de balón, que xa puido amosar na súa anterior etapa, na que disputou seis encontros, cun papel protagonista na Copa Federación, na que o equipo chegou á final nacional, e na Copa do Rei.
Neste senso, coa súa incorporación, o plantel dirixido por Carlos de Lerma reforza unha posición fundamental para a nova campaña, á vez que recupera para o seu proxecto a un futbolista que xa sabe o que significa defender a camiseta branquiazul.
Iago Domínguez retorna ao club coa experiencia adquirida no Somozas, equipo no que disputou 33 encontros, 31 partindo de inicio, nos que encaixou 28 goles, sendo un dos porteiros menos goleados do Grupo 1 da Terceira Federación. Ademais, as doce porterías a cero alcanzadas demostran a súa notable regularidade ao longo do curso.
Estas dúas últimas campañas engádense a unha importante traxectoria no fútbol galego e nacional. Formado na canteira do Real Club Celta de Vigo, onde foi superando categorías ata chegar e debutar co filial na Segunda División B, pasou polas filas do CD Arenteiro e do CD Mirandés, antes da súa primeira etapa no Compos.
Agora, Iago Domínguez afronta este novo reto con ilusión e con gañas de volver atoparse cunha afección que xa coñece, disposto a traballar desde o primeiro día para axudar ao equipo para alcanzar os seus obxectivos.
Tras facer a pretempada co Gran Peña, da Terceira Federación, sumouse hoxe aos adestramentos e, se o corpo técnico así o decide, estará xa á disposición esta próxima fin de semana para o comezo da Liga.
Benvido de novo, Iago!
