-
O Compos empatou a ceros en Portugalete nun duelo moi igualado
Santiago de Compostela, 13 de setembro de 2026
A SD Compostela conseguiu en Portugalete o primeiro punto da tempada. Os nosos inauguraron a marcadora na primeira saída da campaña. Un 0-0 en Portugalete, nun duelo moi igualado que puido caer para calquera lado.
Na primeira parte, o Compos, tralos tropezos da primeira xornada e da Copa, saltou moi valente ao campo da Florida, buscando aproveitar o seu dinamismo en ataque e sacando rédito da súa presión alta.
Aos cinco minutos, entre Antón Guisande e Edu González non foron quen de resolver un bo balón en longo de Edu Sousa. E cinco máis tarde, Manu Rivas cruzou en exceso un chute desde dentro da área.
Tamén terían a súa oportunidade os locais, pasada a media hora, nun bo golpeo de Ikañi Recio que sacou Edu Sousa a córner cunha gran estirada. En todo caso, a última da primeira parte sería branquiazul, nas botas de Antón Guisande, pero en boa posición para o remate, non disparou e a defensa puido corrixir a acción.
Á volta dos vestiarios, e como ao comezo, o Compos saltou cunha marcha máis e tivo a máis clara do partido aos tres minutos. Un centro de Antón Guisande escapóuselle ao porteiro e Roque, recentemente entrado por lesión de Jordan, chegou para remachar a pracer, pero cando xa se cantaba o gol, un defensa apareceu in extremis para despexar.
O lateral amesán sería tamén protagonista minutos máis tarde, poñendo un centro perigoso para Dani González, pero o remate de primeiras do centrocampista foi rexeitado por Ibón.
Co discorrer dos minutos, o Portugalete, co apoio da súa afección, foi dando pasos adiante e tería a súa gran oportunidade na recta final do duelo cun penalti a favor. Lanzou Imanol Aranburu alto e á esquerda da portería, pero aí apareceu un inconmensurable Edu Sousa para realizar a parada do partido. Unha man salvadora que valeu un punto para o Compos.
Deste xeito, o encontro na Florida acabou como empezou, 0-0. Un punto para iniciar o contador na Liga para un Compos que intentará facer bo o punto na casa. Este próximo domingo, ás 17.00 horas, visita o Vero Boquete o Sestao River.
FICHA TÉCNICA
0 – Club Portugalete: Ibón González; Anartz Amilibia, Iñaki Recio, Ander González, Iker Llamazares, Oier Erdozia (Diego Lamadrid, min.73), Jorge García (Yeray Cuello, min.84), Aimar Barrera (Lete, min.73), Gorka Tapiador, Jon López (Imanol Aranburu, min.68) e Gorka Crespo.
0 – SD Compostela: Edu Sousa; Miguel Prado, Diego Uzal, Pablo Crespo (Damián, min.59); Jordan Sánchez (Roque, min.46), Ces Cotos (Parapar, min.73), Unai Peón, Manu Rivas; Dani González, Antón Guisande (Buba, min.59) e Edu González (Teofilovic, min.90+1).
Árbitro: Sergio Martínez (Navarra). Amoestou a Oier Erdozia, Gorka Crespo, Lete e Gorka Tapiador, polo Portugalete; e a Edu González, Diego Uzal, Roque e Dani González, polo Compos.
Incidencias: Estadio La Florida (Portugalete). Xornada 2 de Liga do Grupo 1 da Segunda Federación.
