-
O Compos acadou os tres puntos na casa con dúas gadoupadas nos minutos finais, de Unai Peón e Antón Guisande
Santiago de Compostela, 20 de setembro de 2026
A SD Compostela acadou tres puntos de ouro contra o Sestao River. Os nosos superaron os vascos por 2-0 con dous golazos na recta final do duelo. Primeiro Unai Peón e despois Antón Guisande selaron a primeira vitoria da tempada.
Regresou o Compos ao Vero Boquete coa intención de conseguir o primeiro triunfo na casa. Tras sumar en Portugalete, os nosos querían facer bo o punto cun máis tres no Vero Boquete.
Nunha tarde asollada e de altas temperaturas, comezaron mellor os visitantes, ante un Compos ao que lle custou iniciar desde atrás. Edu Sousa estivo providencial nesa primeira media hora, salvando dous mans a mans tras senllos roubos visitantes en última liña. E despois dun dos córneres lanzados polos visitantes, tamén se estirou para sacar unha gran man a disparo de Eneko.
En todo caso, co paso dos minutos, e sobre todo trala pausa de hidratación, o Compos asentouse mellor sobre o verde e tivo a súa mellor opción nas botas de Manu Rivas. O carril avanzou por banda, tras un bo cambiou de orientación de Edu González, pero atopouse coa estirada de Iru, fillo do histórico porteiro da SD Compostela, ao seu disparo duro abaixo. E no rexeite, desde o punto de penalti, mandouna arriba coa dereita.
Chegouse ao tempo intermedio coa igualada inicial de 0-0.
Á volta dos vestiarios, con dobre cambio no once branquiazul, a contenda igualouse. Os nosos tapaban mellor os espazos, o Sestao non podía correr e o Compos comezou a crecer.
Tras uns intentos con escaso perigo do rival, Mario Hermo comezou avisando, despregándose por banda dereita, pero o seu disparo saíu frouxo e ao medio. Pouco máis tarde, Antón Guisande, que xa fora protagonista na anterior, foi quen de desfacerse do seu par, chegou a encarar ao porteiro, pero intentou o pase da morte para Parapar e un defensa evitouna ao límite.
A contenda estaba nesas transicións locais e acabou chegando o premio no 86. Tras unha xogada trenzada, con centro ao segundo pau de Mario Hermo, Antón Guisande devolveuna atrás, ninguén rematou na área, pero a pelota caeu na frontal e alí estaba Unai Peón, o central, que non o pensou. Golpeou con toda a súa forza e cravouna na escuadra. Unha barbaridade de gol e 1-0.
Tocou defenderse da estirada final do Sestao, que buscou o empate á desesperada, pero o que apareceu foi o segundo dos nosos. Subiu Iru nun córner, a portería quedou despoboada e Antón Guisande, moi lampantín, disparou coa zurda desde o centro do campo e a pelota entrou mansa na rede. Outro golazo, 2-0 e delirio na bancada porque se garantían os tres puntos.
Con este triunfo, o primeiro da tempada, os nosos quítanse un peso de encima e conseguen escalar na clasificación. Tras romper a dinámica negativa e sumar os tres puntos, agora tocará unha nova visita ao País Vasco, nesta ocasión para medirse ao Eibar B.
FICHA TÉCNICA
2 – SD Compostela: Edu Sousa; Miguel Prado, Diego Uzal (Unai Peón, min.46), Roque (Pablo Crespo, min.46); Mario Hermo, Ces Cotos (Goris, min.75), Dani González, Manu Rivas; Parapar (Álex Gil, min.84), Buba (Antón Guisande, min.62) e Edu González.
0 – Sestao River Club: Iru; Peral, Argente, Andoni Ugarte, Jon Rojo; Casteñeda (Zearreta, mim.69); Castillo (Arzak, min.69), Eneko (Carlos González, min.83), Laka, Pau Miguélez (Legu, min.83); e Zorrilla (Carrión, min.58).
Goles: 1-0: Unai Peón, min.86; 2-0: Antón Guisande, min.90+6.
Árbitro: Enrique Gao (Asturias). Amoestou a Roque, Parapar, Manu Rivas e Carlos de Lerma (banco), polo Compos; e a Eneko, Andoni Ugarte e Carrión, polo Sestao River.
Incidencias: Estadio Vero Boquete de San Lázaro (Santiago de Compostela). Xornada 3 de Liga do Grupo 1 da Segunda Federación disputado ante 1.050 espectadores.
