-
Álvaro Casas, procedente do Oviedo B, firma ata xuño de 2019.
Santiago de Compostela, a 4 de Xuño de 2017.
Un pivote defensivo picheleiro, Álvaro Casas Rancaño (26/04/1994), é o primeiro reforzo para a nova tempada da SD Compostela. O futbolista santiagués, procedente do Oviedo B, firma ata xuño de 2019 co conxunto dirixido por Yago Iglesias.
Álvaro é un mediocentro defensivo, aínda que tamén pode actuar de central, moi intenso e físico. O futbolista santiagués, quen creceu nas categorías inferiores do Celta, regresa á súa casa, para triunfar nunha categoría na que conta con dous anos de experiencia. Ademais, tamén disputou dous cursos en Segunda División B.
O centrocampista, tras asentarse no Celta Xuvenil de División de Honra, foise cedido ao Alondras na tempada 2013-14. Alí, foi unha xogador chave para os vigueses, participando en 34 encontros e anotando dous goles. Grazas a este rendemento, o Celta repescaríao para o seguinte ano. Nunha tempada na que o filial quedou en media táboa, Álvaro xogou quince encontros, dez deles de titular.
A pesar diso, colleu as maletas e foise a Canarias para xogar no Mensajero, conxunto recentemente ascendido a Segunda B. En terras insulares participaría en vinte encontros, catorce no once inicial, nun curso no que o conxunto canario logrou a fazaña de salvarse con xornadas de adianto.
E das illas a Asturias, onde ficharía polo Oviedo, equipo do grupo 2 da Terceira División do que procede. Cos azulóns, participou en 29 encontros, 27 deles de titular, e iso que perdeu unha parte do campionato por unha lesión.
Tras este breve paso polos ovetenses, Álvaro regresa á cidade que o viu nacer, buscando recuperar as sensacións que gozou en terras galegas. Ás ordes de Yago, buscará facerse un oco no centro do campo branquiazul, ou ben no centro da zaga.
