Santiago de Compostela, ao 19 de xullo de 2017.
O mediapunta coruñés Álex Ares Piñeiro foi presentado esta mañá nas instalacións da cafetería Samarkanda, no centro comercial Novo Milladoiro, como novo xogador da SD Compostela. Acompañado polo director das relacións institucionais do club, Ramón Castro, o director de márketing, Javier Puñal, e o propietario do local de Milladoiro, Adrián Pérez, realizou as súas primeiras declaracións ante os medios de comunicación.
En primeiro lugar, o xogador branquiazul declarouse “moi ilusionado por estar no Compos”. Cun primeiro adestramento nas pernas, Álex está a empezar aos poucos a coller sensacións e confianza cos compañeiros. A maioría deles repiten do ano pasado, polo que “os novos temos que adaptarnos”. Xuntos conforman, segundo a nova fichaxe, un conxunto novo e con moitas ganas de facer cousas importantes.
En canto á proposta da entidade santiaguesa, o xogador declarou que se alegrou moito cando o chamaron e que non lle custou decidirse, a pesar de ter outras propostas, porque é un dos clubs máis grandes de Galicia. Por esta razón, asegura que achegará moita ilusión e ganas para lograr os obxectivos. Para alcanzar esas metas “temos que coñecernos canto antes e despois lograr a maior cantidade de vitorias posibles”.
Coa meta do playoff, un experto como el nestas lides, sabe que a liga seguirá a tónica dos últimos anos, con “Boiro, Somozas, Bergantiños, Arousa e algún máis loitando arriba”. E para que o Compos entre nel, será importante “ter a iniciativa co balón”, un tipo de xogo que gusta ao mediapunta.
Tras dúas tempadas xogando o playoff co Cerceda, Álex Ares espera repetir experiencia no seu novo equipo, tendo máis sorte nesa fase.
