-
O santiagués recibiu o premio no córner oficial, en Reizentolo, da man do xefe de vendas da zona norte de Galicia.
Santiago de Compostela, ao 10 de xaneiro de 2018.
Dentro da gran primeira volta realizada polo Compos con 42 puntos, a afección outorgou a Álvaro Casas o premio ao #Xogador5EstrellasCompos da primeira volta, galardón que o nomea como o futbolista máis destacado do equipo nesta primeira parte do campionato.
O mozo santiagués, que chegou este verán procedente do Oviedo B, conquistou á afección branquiazul coas súas grandes actuacións ao longo do que vai de ano. Nestas 19 xornadas, Álvaro só se perdeu 22 minutos, sendo a peza máis utilizada por Yago Iglesias. Neste tempo xogou tanto de mediocentro como de central, demostando desta maneira a súa polivalencia.
Esta mañá, no córner oficial da SD Compostela, en Reizentolo (Rúa do Vilar 43), o santiagués recibiu o premio da man de Juan Carlos García, xefe de ventas da zona norte de Mahou. No acto tamén estiveron presentes Javier Puñal, director de márketing do club, e Manu Castiñeiras, director deportivo da entidade.
Tras recoller o galardón, Álvaro Casas quixo destacar que este é un premio que demostra o valor do colectivo. Non quixo darlle maior importancia no que ao seu rendemento se refire, pero si que se sente orgulloso de que a afección o valore tan ben, aínda que sabe que os amigos e familiares influenciaron na votación.
No plano deportivo, Álvaro aclarou que aínda “queda un mundo” e por iso “a filosofía de ir semana a semana é a que debemos seguir. Se sumamos de tres este domingo daremos un pasiño máis para achegarnos ao obxectivo”, explicou.
Este gran rendemento vén acompañado de grandes actuacións de visitantes, onde o Compos suma xa oito vitorias. “Estamos cómodos fóra. A idea é a mesma, pero cun par de retoques polo campo, como o outro día. Ao final é sumar e se volves cos tres puntos de campos como A Grela, Bergantiños ou Barbadás, dáche un gran colchón”, comentou.
En canto á súa posición, Álvaro vese “onde me necesite o míster” e detallou: “Polas sancións e as lesións de dous dos mellores centrais da categoría acabei aí, pero agora estamos todos e non sei en que posición me utilizará o míster. No medio está a traballar moi ben Mon, Tomás…Samu fixo un partidazo o domingo, está moi caro xogar neste Compos”.
Ao seu gran rendemento tamén vén influenciado pola comodidade que lle achega a SD Compostela. “Estou na miña casa e se a iso lle sumas que no deportivo vai ben e que o grupo humano é ideal, máis non se pode pedir”, concluíu.
