-
Os branquiazuis superaron por 1-2 ao Ribadumia e certifican o terceiro posto ao final de liga
Santiago de Compostela, a 5 de maio de 2019.
A SD Compostela é novo equipo de playoff no grupo 1 da Terceira División. Os branquiazuis superaron ao Ribadumia por 1-2, nun encontro non falto de sufrimento, e clasificáronse de forma matemática para a postemporada como terceiros clasificados. Ademais, no Campo da Senra, os branquiazuis romperon un dobre refacho, dúas derrotas seguidas e tres fóra de casa.
Aythami e Miki puxeron o encontro de clara cor branquiazul no primeiro acto, pero á volta dos vestiarios este cambiou tras a expulsión de Aythami. O gol de Cerqueiras púxolle emoción ao duelo, pero o Compos soubo sufrir e aguantou a vantaxe ata o final.
Coñecendo a igualada do Alondras antes do inicio do partido, o que lle permitía asegurar o terceiro posto da táboa se gañaba, o Compos saltou a por todas. Os branquiazuis tiñan clara a súa meta e querían despexar as posibles dúbidas polas dúas derrotas consecutivas, axudados tamén polos cen afeccionados que se desprazaron desde a capital para apoiar aos seus.
Con esta mentalidade, os nosos non puideron empezar mellor, xa que aos cinco minutos aproveitaron un roubo no centro do campo para montar unha contra rápida que acabou no fondo da rede. Brais Abelenda conectou de primeiras ao espazo cara a Aythami e o dianteiro canario plantouse no man a man ante Roberto Pazos, ao que superou cun disparo cruzado potente.
Pese ao tanto inaugural, os branquiazuis non baixaron o pistón e seguiron insistindo sobre a área local. Primeiro, Aythami rozou o dobrete cun remate de cabeza á saída dun córner, o cal detivo o porteiro na liña, e despois, aos 19 minutos, caeu o segundo noutra contra de libro.
De novo apareceu ao espazo o punta, gañándolle o duelo ao central, e esta vez serviu a asistencia para a entrada en carreira de Miki, quen chegou ata a área pequena e definiu cun sutil toque coa dereita entre as pernas de Pazos, marcando por segunda xornada consecutiva.
Dobrando a súa vantaxe, o Compos fixo seu o partido e pasou a dominar coa posesión do esférico, con todo, as ocasións seguiron chegando, rozando o terceiro por dúas oportunidades antes do intermedio.
Á media hora, os mesmos protagonistas do tanto anterior intercambiáronse os papeis, malia que a sorte foi diferente. Miki colgou o centro desde a dereita e Aythami rematou de cabeza á escuadra, pero o gardameta voou para despexar a pelota a córner. Mentres tanto, nos últimos compases, Aythami roubou o saque en curto do meta, asistiu a Álex Ares e de novo Roberto Pazos obrou o milagre para sacala co pé a córner.
Á volta dos vestiarios, a pesar dos tres cambios seguidos nos locais, os nosos seguiron co mesmo plan de xogo, pero a contenda cambiou por completo cando o árbitro expulsou a Aythami no 55. O dianteiro recibiu a primeira amarela por un desprazamento de balón e cinco máis tarde a segunda por protestar.
Contra dez, o Ribadumia gañou enteiros, comezou a atacar e atopou o premio no 62. Aarón fixo unha gran xogada individual, recortando a Álvaro Casas e soltando un gran disparo que a pesar de ser despexado por Anxo Pérez, o seu rexeite caeu nos pés dun Cerqueiras que definiu coa zurda sen oposición.
Coa mesma inercia, Cerqueiras nun lanzamento de falta que se foi arriba, e Monchito, cun golpeo desde a frontal que despexou Anxo, levaron máis perigo sobre a área compostelanista, aínda que os santiagueses tamén rozaron o terceiro cunha clara dobre tentativa no 78. Marcos Remeseiro acomodou un golpeo desde a frontal que tocou Roberto Pazos e pegou no pau, pero o rexeite caeu nos pés de Santi, quen desde a área pequena enviou a pelota por encima do traveseiro.
Coa vantaxe mínima, os últimos minutos foron de sufrimento, cun Compos despexando os centros dos locais, pero o marcador xa non se moveu e os nosos celebraron unha vitoria moi importante, tras dúas xornadas sen conseguila, que lles asegura matematicamente ser equipo de playoff. Os branquiazuis, a falta de dúas citas, poderán regular as súas forzas xa que pasarán de terceiros á postemporada.
FICHA TÉCNICA:
1- CD Ribadumia: Roberto Pazos; Santi, Manu (Rodri, m.46), Manu Bugallo (Cheri, m.50), Diego; Óscar, Gabi; Monchito, Tomás (Eloy, m.46), Cerqueiras; e Aarón.
2- SD Compostela: Anxo Pérez; Sergio Pereira, Álvaro Casas, Piscu, Naveira; Mon (Josiño, m.92), Marcos Remeseiro; Miki, Álex Ares (Santi, m.71), Brais Abelenda (David Uña, m.77); e Aythami.
Goles: 0-1: Aythami, min.5; 0-2: Miki, min.19; 1-2: Cerqueiras, min.62.
Árbitro: López Parga, comité lucense. Expulsou a Aythami (m.55) por dobre amarela e Manu Castiñeiras (m.94) no banco. Ademais, amoestou a Mon, Álvaro Casas, Marcos Remeseiro, Álex Ares e Naveira. polos visitantes.
Incidencias: Partido da trixésimo sexta xornada de liga do grupo 1 da Terceira División disputado no Campo da Senra ante 450 espectadores.
