- O novo xogador branquiazul foi presentado este mediodía no Café-Bar París, novo patrocinador do club
Santiago de Compostela, a 26 de Agosto de 2020.
Juan Pablo Barros Campos xa está en Santiago. O xogador zurdo foi presentado esta mañá como novo xogador da SD Compostela nas instalacións do Café-Bar París, novo patrocinador oficial do club na tempada de regreso á Segunda División B. Nas súas primeiras declaracións como compostelanista, Juampa destacou a ilusión que ten por xogar no club da súa cidade e cun proxecto futbolístico tan interesante.
“Estaba contento onde estaba, pero creo que no fútbol hai que aproveitar as oportunidades. Veño porque é unha oportunidade deportiva única, non polo feito de volver a casa. Deportivamente é un club moi bo e que mellor que sexa da cidade onde vivín sempre”, destacou ante os medios de comunicación.
Ademais de reforzarse cun futbolista da casa, o Compos tamén se nutre da experiencia que atesoura Juampa aos seus 26 anos. “Comecei moi novo en Segunda B e por sorte mantívenme aí. Agora, espero poder seguir crecendo”, comentou.
Coa alegría de “vir ao equipo da túa cidade” e coas ganas “de poder estar aquí”, agarda lograr os obxectivos nunha tempada que considera moi ilusionante. “Hai moi bo equipo, moi bos xogadores e creo que en Segunda B moitos deles serán mellores xogadores. Creo que podemos competir e facer un bo ano”, subliñou.
Do mesmo xeito, coa base que mantén o equipo, Juampa considera que os branquiazuis poderán seguir apostando polo xogo que os caracteriza. “A pesar de ser unha categoría máis, cos xogadores e o corpo técnico que temos, poderanse desenvolver os partidos coa mesma idea de xogo”, sinalou.
Por último, a nivel individual, Juampa confesou que antigos compañeiros seus, cos que coincidirá de novo en Santiago, faláronlle marabillas do proxecto e do club. Por iso, tampouco se pecha a ningunha posición no campo, senón que estará ao dispor do que decrete Yago Iglesias. “Adáptome a varios postos, así que o adestrador decidirá onde me irá mellor a min e, sobre todo, ao equipo”, concluíu.
No acto, Juampa estivo acompañado polo seu pai, Juan Carlos Barros, e o director deportivo da SD Compostela, Manuel Castiñeiras.
