-
Michel Alonso agarda un Compos dominador, coma no Vero Boquete para lograr, ante o Guijuelo, a súa primeira vitoria en artificial da tempada
Santiago de Compostela, 16 de novembro de 2023
A SD Compostela regresou o pasado domingo á senda da vitoria e, con ese impulso, agora afronta un novo reto. Os nosos queren volver gañar como visitantes, facéndoo ademais nun terreo de herba artificial. O obxectivo, por tanto, é desquitarse da derrota en Langreo e mostrar, de novo, esas grandes sensacións. Con todo, a tarefa non será sinxela, debido a que enfronte estará un Guijuelo invicto como local e que está en postos de playoff.
Por iso, para lograr o obxectivo, Michel Alonso apuntou na previa a necesidade de que o Compos se pareza ao equipo do Vero Boquete. Un Compos dominador e sólido, para poder superar a un duro rival.
Estado do plantel.
En principio, recuperamos a algún xogador. Riki Mangana penso que vai poder chegar ao partido. Despois, aínda que Fran xa está tamén facendo cousas, aínda vai estar fóra unhas semanas. E ademais, están fóra Soto e Samu Araujo.
Mellores ánimos tras gañar na casa.
Totalmente. Cando ves de non gañar, como foi o partido anterior, conseguir unha vitoria é importante. Os ánimos durante toda a semana foron moi bos, aínda que xa o foron despois de Langreo, e nese aspecto estou moi contento coa semana.
Reto de gañar en artificial.
Non ten que ser escusa. Aínda que o noso campo é de herba natural e os adestramentos habituais tamén son en natural, temos a posibilidade de adestrar en artificial e non ten que ser escusa. Esta semana estivemos adestrando en Sergas para adaptarnos o mellor posible a esa superficie.
O Guijuelo, un duro rival.
O Guijuelo está invicto na casa, leva catro vitorias e un empate. É un equipo cun nivel técnico de nivel alto da categoría. Un equipo cunha referencia arriba, xa sexa Dieng ou Juan Antonio, que lles da opcións de xogar directo, cambiando o seu xogo combinativo. Un equipo moi complicado, que os números o están a corroborar.
Que Compos che gustaría ver.
Vimos de perder en Langreo e gustaríame que o Compos deste sábado sexa máis parecido ao Compos da casa, que é un equipo dominador, que xoga en campo rival e que xera moitas ocasións. Isto é fútbol e temos que ser un equipo que non se note a diferencia entre xogar na casa ou facelo fóra.
