-
Antón Guisande chega desde a UD Ourense, onde foi clave para o ascenso sendo o pichichi do equipo con 10 goles
Santiago de Compostela, 25 de xuño de 2025
Velocidade e gol para o ataque da SD Compostela: Antón Guisande Fernández (Pontevedra, 09/06/2000) é novo xogador do Compos. O atacante pontevedrés chega desde a UD Ourense, coa que logrou o ascenso a Segunda RFEF sendo o pichichi do equipo con 10 goles. Firma por unha tempada.
Antón Guisande é un atacante polivalente, que se desempeña principalmente como extremo, aínda que tamén pode actuar como dianteiro centro, e que destaca pola súa velocidade, desequilibrio e capacidade goleadora. Estas calidades demostrounas na súa última etapa na UD Ourense, conxunto desde o que chega a Compostela tras ser peza fundamental para acadar o ascenso.
Nesta última campaña na UDO, na que o equipo de As Burgas conseguiu o título de Liga, o novo xogador branquiazul disputou 32 encontros, 28 como titular e 2.500 minutos de xogo, anotando 10 goles, pichichi do equipo.
Foi a última das súas tres campañas en Ourense, todas elas en Terceira Federación, pechando unha etapa de crecemento con 101 partidos disputados, nos que asinou 16 goles.
Anteriormente, e tras formarse nas categorías inferiores do Areosa, comezou a súa carreira deportiva no Pontevedra, conxunto ao que chegou no seu último ano de xuvenil. De División de Honra saltou ao filial, de Preferente, no que estivo tamén tres tempadas, dúas delas afectadas pola pandemia. Con todo, chegou aos 60 partidos disputados, nos que asinou 20 goles.
Con esas dúas experiencias ás súas costas, agora chega ao Compos co obxectivo de seguir crecendo, de continuar coa súa proxección e lograr un novo ascenso á Segunda RFEF.
Benvido, Antón!
