-
Quico chega de Segunda RFEF e firma por unha tempada
Santiago de Compostela, 26 de xuño de 2025
A SD Compostela 2025/26 refórzase cun muro para a súa defensa: Francisco González Rochela (Vilalba, 29/05/1992), ‘Quico’. O central lucense, que chega tras dúas tempadas na Segunda RFEF, conta cunha longa traxectoria no fútbol nacional e galego. Firma por unha campaña.
O Compos refórzase cun defensor de gran envergadura co seu máis de metro noventa. Un líder da zaga, con grandes calidades defensivas e que destaca por ser un gañador de duelos en ambas áreas. A todo iso, aos seus 33 anos, suma a súa gran carreira deportiva.
Quico chega ao Compos tras unha última campaña no Penya Deportiva de Ibiza, de Segunda Federación, no que disputou 21 encontros para máis de 1.500 minutos de xogo. Ademais, anotou un gol e repartiu unha asistencia.
Deste xeito, regresa a Galicia, onde conta cun longo historial futbolístico, que comezou no Somozas, tras saír da canteira do Racing de Ferrol, para pasar posteriormente por Vilalbés, Rápido de Bouzas, na Segunda B, de novo Somozas e por último Vilalbés. Precisamente, na súa terra natal, xogou fai dúas campañas na Segunda RFEF, sendo peza capital do equipo chairego con 34 partidos, todos como titular, e 2 goles anotados.
Ademais da súa traxectoria en terras galegas, Quico tamén xogou no Mar Menor, no Real Murcia Imperial, no Badaxoz, no Formentera, dúas tempadas con ascenso incluído á Segunda B; no Don Benito, tamén de Segunda B, e no Guadalaxara, así como a citada última campaña no Penya Deportiva, de Segunda RFEF.
Por tanto, o novo futbolista branquiazul, quinta fichaxe ata a data, tamén achegará moita experiencia ao equipo dirixido por Secho. E farao co obxectivo de conseguir o ascenso co Compos.
Benvido, Quico!
