-
A nova camiseta do Compos, patrocinada por SANTIAGO EN VIVO, estará á venta dende mañá mércores
Santiago de Compostela, 22 de xullo de 2025
Unha camiseta especial, con Santiago por bandeira, para alentar o noso sentimento 100% Picheleiro. A SD Compostela presentou esta mañá no Pazo de Raxoi a súa nova camiseta para a Tempada 2025/26, unha indumentaria branquiazul que conta co patrocinio principal de SANTIAGO EN VIVO.
A nova camiseta do Compos, da marca Adidas, mantén o predominio do branco e azul, cun formato diagonal que se potencia cos detalles en negro. Unha indumentaria que leva a cidade moi presente, coa cuncha do Camiño no peito e co patrocinio de SANTIAGO EN VIVO no frontal. Ademais, na parte traseira, conta tamén co patrocinio doutra empresa compostelá: VIMBIO CORP.
A indumentaria branquiazul para a Tempada 25/26 estará á venta a partir deste mércores 23 de xullo. A camiseta do Compos poderase mercar na Tenda Oficial da SD Compostela (Rúa da Raíña, 8), así como na Tenda Online: Accede á Tenda Online do Compos.
Ademais, como novidade, este mércores tamén se poderá mercar no Estadio Vero Boquete de San Lázaro, con motivo do amigable contra o Deportivo.
O prezo da equipación é de 64,95€, recordando que os abonados do Compos contan cun 10% de desconto sobre este prezo.
Presentación no Pazo de Raxoi.
Esta mañá, a nova camiseta do Compos foi presentada no Pazo de Raxoi coa presenza da corporación municipal e dos patrocinadores principais. Un acto especial para anunciar unha camiseta especial. Ademais, o encontro serviu tamén para destacar o amigable de mañá contra o Deportivo, encadrado nas Festas do Apóstolo e en beneficio de Asanog Galicia, tamén presentes.
Sobre SANTIAGO EN VIVO.
SANTIAGO EN VIVO, un proxecto do Grupo Fisela, trátase dun evento dinámico que se constrúe coa participación de toda a comunidade e está aberto ás propostas de todos aqueles que queiran implicarse e valorar os seus proxectos.
Un proxecto global, que vai máis aló dun simple evento (celebrado o pasado mes de xuño) e que ten por obxectivo que Santiago de Compostela recupere o seu lugar como epicentro da vida, a innovación e o dinamismo en Galicia. Por iso, levan a cabo accións como o patrocinio da camiseta do Compos.
Unha marca que quere transformar a nosa cidade con propostas que sorprendan, ilusionen e mobilicen.
Sobre VIMBIO CORP.
VIMBIO CORP é unha empresa compostelá que impulsa a innovación, a tecnoloxía e a sustentabilidade. As súas marcas en iluminación, saúde, tecnoloxía e comunicación crean solucións flexibles e personalizadas que melloran a contorna e xeran un impacto positivo na sociedade.
Unha marca creada neste 2025, que nace da fusión entre Moonoff e Niucom, para impulsar e fortalecer o seu crecemento en Europa.
Con esta unión, a corporación contempla unha carteira de servizos que inclúen iluminación, saúde, tecnoloxía e telefonía.
