O Burgos é outro dos chamados “histórico” do fútbol español, que actualmente milita na división de bronce, tras unha longa e dilatada traxectoria en 1ª e 2ª división. Fundado no ano 1922, non logrou consolidarse en 2ª división ata a década dos 50. En 1964 construiuse o Estadio Municipal O Plantío, que é onde actualmente xoga o Burgos. Na década dos 70 é cando o Burgos vive a súa etapa dourada, militando en 1ª división durante catro tempadas, contando con Juanito como líder e emblema daquel equipo.
Logo daqueles anos de gloria, chegaron os descensos, as decepcións, a crise sobre o club acentuouse ata o punto de que estivo a piques de desaparecer. Na actualidade, o club castelán preséntase como un dos equipos de maior potencial no Grupo I da Segunda División B.
Actualmente é undécimo na clasificación con tres vitorias, dous empates e tres derrotas. Con esta bagaxe, o Burgos C.F. recibirá este domingo á S.D. Compostela no Plantío; un campo que os santiagueses visitarán coa idea de mudar a súa actual situación. No Plantío os homes de Iñaki Alonso buscarán o primeiro triunfo a domicilio.
O partido será dirixido polo colexiado D. Hugo José López Porta, do Comité Territorial Madrileño.
Para aqueles afeccionados que queiran desprazarse a Burgos, o prezo das localidades é o seguinte:
Tribuna: 20€
Lateral e Fondos: 15€
Ata 14 anos: 5€ en Fondos e 7€ en Tribuna
