- A maior ambición do Castro puido coa calidade dun Compos que baixou o seu nivel na segunda metade.
Santiago de Compostela, a 19 de Setembro de 2016.
Terminouse a xeira. A SD Compostela puxo fin a tres partidos partidos consecutivos sumando, despois de caer derrotados no Municipal, ante o Castro, por dous goles a un.
O conxunto de Yago Iglesias, a pesar de que se puxo por diante á media hora de xogo, viuse superado, sobre todo na segunda parte, por un equipo local, no que as ganas por derrotar a un equipo histórico superaron a maior calidade deste.
O Compos chegaba ao encontro coa bitola de ser o favorito, e así o mostrou na primeira media hora. 30 minutos nos que o balón foi compostelán e tamén as ocasións.
Primeiro foi Mitogo o que desaproveitou unha clara ocasión, que saíu rozando o poste, e despois Santi Gegunde mandou ao lateral da rede outra gran oportunidade.
E por fin, á terceira foi a vencida. Santi mandaba ao espazo un balón para Diego Rey, este centraba, e tras unha indecisión da defensa, Mitogol non marraba, anotando así o seu segundo gol da tempada.
Con todo, co gol branquiazul, o equipo desapareceu. Fíxolle moito dano, sobre todo, a rápida reacción local, xa que tres minutos despois do tanto de Mitogo, chegou o empate. Tras un barullo na área, Héctor mandaba o balón á rede, cun disparo que deu contra un defensa, despistando a Lucas, que non puido facer nada.
O gol deu ás aos locais, e pese que ata o descanso non houbo apenas achegamentos, na segunda, aos cinco minutos estrelaban un balón contra o poste, de novo tras un tiro de Héctor.
Reaccionou rapidamente Yago dando entrada a Martín e Tomás, pero a situación non variou, aínda que tiveron a súa cun remate de Make, que se foi arriba por pouco.
Premio ao dominio lucense, chegou o gol. Foi o dianteiro local Iván González o encargado de embocar un gran centro de Alvarito no minuto 72, para selar a segunda vitoria do Castro neste curso.
A pesar de que restaban vinte minutos por diante e que o Compos tentou ir a por todas coa entrada de Nogueira por Samu, o marcador xa non se moveu e os tres puntos quedaron na casa.
Derrota ante un rival que sae moi reforzado despois do encontro. Un revés que non debe afectar ó conxunto santiagués, que se mantén na metade de táboa, duodécimo, con sete puntos, a tres do cuarto posto do Rápido de Bouzas.
Para achegarse aos postos de playoff e retomar a senda do triunfo, o Compos verase as caras o fin de semana que vén ante o As Pontes, que aínda non coñece a vitoria no que vai de campaña. San Lázaro debe continuar sendo un fortín.
