-
Os dous infantís e os benxamíns foron os triunfadores da xornada dos equipos da base.
Santiago de Compostela, a 28 de Setembro de 2016.
Resísteselle a vitoria ao xuvenil A adestrado por Becho. Outra xornada máis, suman outro empate. Un punto que se certificou no último minuto.
Un gol de Borja Míguez no minuto 89 permitiu aos xuvenís de Liga Nacional conseguir un punto en casa contra o Conxo. Con dous puntos, están fóra do descenso, décimo cuartos.
Peor sorte correu o xuvenil B, que perdeu por catro goles a un ante o Manuel Peleteiro e cae a postos de descenso. A pesar de que se adiantou no marcador co gol de Roberto Seoane no minuto 5, a segunda parte fíxoselle moi longa ao conxunto dirixido por Diego Gutiérrez.
En canto ao Cadete, que chegaba de líder e invicto, perdeu na casa ante o CD Unión. O conxunto da ría de Arousa púxose por diante nos primeiros compases do partido, e a pesar de que a SD logrou empatar por mediación de Cristian Cerban, conseguiron superar o golpe e anotar dous goles máis. Agora, o conxunto de Guillermo Gil descende ao quinto posto con nove puntos.
Ao contrario que o cadete, o Infantil A gañou e convenceu ante o CD Unión, tamén na casa. Os goles na segunda metade de Anxo Ferro, Alejandro Parga e Iago Fernández certificaron o triunfo local por tres goles a cero.
Con esta vitoria, o equipo santiagués queda quinto na táboa con nove puntos, tras gañar tres dos catro encontros disputados.
O Infantil B tamén venceu e convenceu. Os nenos da base gañaron fóra de casa ao Vitoria FC por dous goles a cinco.
Os branquiazuis saíron moi motivados ao campo e á media hora do partido xa ían gañando por 0 a 4. O gol de Mauro Iglesias e o hat trick de Alejandro Dopazo puxeron o partido moi de fronte, aínda que sería Rubén Sande quen anotase o gol definitivo e o da tranquilidade.
Con este triunfo, os infantís soben ao cuarto posto da clasificación con catro puntos, despois de que empatasen na primeira xornada.
Por último, os benxamíns tamén gañaron no seu primeiro partido de Liga ao La Salle no campo de Santa Isabel. A pesar de que o La Salle se puxo por diante, os goles de David Montes no 21 e de Abril Pazos no 44, pecharon a remontada. Co triunfo, o equipo da base sitúase sexto.
