Santiago de Compostela, a 14 de Xaneiro de 2016.
Unha tarde histórica. Coa masiva asistencia de pais e nenos da canteira, así como dalgúns afeccionados do equipo, a Sociedade Deportiva Compostela presentou onte na tenda do club, en Reizentolo, o primeiro álbum de cromos da historia da entidade.
A colección, que contén un total de 239 cromos, está conformada por todos os xogadores e adestradores das categorías inferiores do equipo branquiazul; o corpo técnico e plantel do primeiro equipo; e os colaboradores, traballadores e directivos do club. Ademais, dentro do álbum tamén atoparemos un póster do primeiro equipo, así como outros aspectos da entidade, como son o himno e a historia da Sociedade Deportiva Compostela. Como detalle, o club tamén personalizou un álbum para cada membro que sae nel, aparecendo o seu cromo na portada.
Con este novo paso, e en palabras de Javier Puñal, director de márketing do Compos, “seguimos evolucionando a nivel interno, interelacionándoo entre si e facéndoo máis agradable para os que estamos nel”. O obxectivo dunha estratexia deste tipo é “buscar coñecemento a nivel interno e externo da historia do club e dos membros que o compoñen”, aclara Javier. Unha pedra máis coa que “pretendemos xerar tendencia dentro de Santiago, como club referente da cidade”, sentenza.
Por último, Javier Puñal quixo agradecer a Reizentolo, Kia e Kilarny, por axudar neste proxecto, así como a Cromogal, artífice da elaboración do álbum.
A partir de agora, todos aqueles que o desexen poderán atopar o álbum e os cromos nos seus diferentes puntos de venda que serán as Oficinas do club no Estadio de San Lázaro, a tenda da entidade en Reizentolo (rúa do Vilar 43), e en Peluquería Kris, no Centro Comercial Novo Milladoiro. A entrega do álbum é gratuíta, mentres que cada sobre de cromos contén seis e valerá 1€.
Aqueles que completen a colección entrarán no sorteo de diferentes premios, por exemplo un smartphone, unha camiseta dun dos equipos da Liga, un póster co teu cromo, unhas botas ou un balón.
A partir de hoxe, os xogadores e membros da SD Compostela serán os protagonistas dos míticos trueques de cromos en colexios, prazas e rúas de Santiago. O sentimento branquiazul latexará en todos os recunchos da cidade.
