Santiago de Compostela, a 23 de Xaneiro de 2017.
As categorías inferiores da Sociedade Deportiva Compostela viviron esta fin de semana unha xornada pouco propicia, xa que sería o Alevín B o único capaz de sacar os tres puntos no seu encontro. Iso si, o conxunto dirixido por Cristian Maneiro fíxoo de forma moi clara, ao gañar por 0-14.
Outro que esbozou un medio sorriso foi o Xuvenil de Liga Nacional. Os de Vecho, tras varias derrotas consecutivas, conseguiron volver sumar grazas a un empate na casa ante o CP Calasancio.
A pesar de que os visitantes se puxeron por diante moi pronto, no 42, Víctor Vilariño igualaría o choque cun tanto que certificaría o 1-1 final.
Con este empate, o conxunto branquiazul segue décimo sexto, aínda que moi preto dos seus inmediatos rivais, aos que tentará superar este domingo, cunha vitoria ante o CD Conxo, no derbi que se disputará ás 12h na Merced.
Por contra, o Xuvenil B non tería tanta sorte e, precisamente, caería ante o CD Conxo, terceiro clasificado na súa Liga, por un gol a cero. Con este resultado baixa ao décimo quinto posto, a un punto de tres rivais. A estes tentaraos superar gañando na casa á AD Manuel Peleteiro, o domingo ás 12h nas Cancelas.
Tampouco puido sumar o Cadete no seu partido como local ante o Amio, e iso que se puxo por diante ao comezo do segundo tempo coa diana de Celestino Gutiérrez. Con todo, os visitantes remontarían o partido para selar un gran triunfo por un gol a dous.
A pesar deste tropezón, o conxunto branquiazul segue colocado no décimo posto. Buscarán mellorar a súa anotación, o domingo ás 11h nas Viñas (Rianxo) contra o CD Unión, novenos con 34 puntos.
Tamén xogarán contra o CD Unión a fin de semana próxima o Infantil A, exactamente será o sábado ás 11h nas Viñas. A este partido chegarán despois de empatar a un gol en casa contra as EDX Oroso, con tanto de Adrián Álvarez.
Pola súa banda, o Infantil B perdeu 2-4 ante o CD Dodro en encontro xogado na Barrosa. Sétimos clasificados, xogarán contra o CD Rois o sábado ás 11h na Braña.
En canto aos alevíns, o A perdeu o seu segundo partido no playoff de ascenso. Púxose por diante moi rápido co tanto de Etien Pignol, pero despois a EF Lalín foi moi superior e acabaría gañando por seis a un.
Buscando sumar os seus primeiros puntos neste playoff, os branquiazuis xogarán o derbi contra o Santiago, o sábado ás 13:30 nas Cancelas.
Mentres, o B goleou ao Vista Alegre, con dianas de Etien Pignol (catro), Andrés Pardal (tres), Damián Piñeiro (tres), Lois Lortes, Xiao Pereiro, Damián González e Juan Manuel Millán.
Con este marcador soben ao quinto posto, no que se tentarán manter cun bo resultado ante a AD Manuel Peleteiro, segundo clasificado. O choque disputarase o sábado ás 10:30 no Municipal da Barrosa.
Mentres, o Benxamín perdeu o seu partido de playoff de descenso por 1-3 ante a AD Manuel Peleteiro. O tanto local foi obra de Giovanny Gallo. Buscarán os seus primeiros puntos, o sábado ás 15:30h nas Cancelas ante o Racing San Lorenzo.
Por último, Anxo Ferro está convocado este mércores coa selección sub15 de Santiago para un adestramento que se disputará ás 16:30h no Municipal da Barrosa.
