Santiago de Compostela, a 1 de Marzo de 2017.
As categorías inferiores da SD Compostela viviron unha fin de semana perfecta, xa que os catro conxuntos que entraron en liza gañaron os seus respectivos encontros.
En primeiro lugar, o xuvenil B superou ao Noia por 0-2, na súa visita ao Municipal de San Lázaro, grazas aos goles de Daniel Abeijón e Marcos Andrade.
Cun novo triunfo, tras moitas xornadas, achéganse aos rivais que o preceden na clasificación, mentres que se afastan dos seus perseguidores, entre eles, o Puebla, rival este domingo ás 11h nas Cancelas.
Outro que levaba moito tempo sen gañar era o Cadete e, do mesmo xeito que os xuvenís, rompeu esa mala xeira. Fíxoo cunha espectacular remontada no campo do Villestro. A pesar de empezar perdendo, sacou os tres puntos cos tantos de Grigor Barbascumpa e de Marcos Andrade, por partida dobre.
Con este 1-3 afiánzanse no décimo lugar. Este sábado ás 20h en Villestro, tentarán superar ao Sporting Estrada, primeiro clasificado e que se mantén invicto na clasificación.
Pola súa banda, o Infantil A sacou os tres puntos na súa difícil visita ao Negreira, logo de gañar por dous goles a catro. Gerardo Lago abriu o marcador, Iago Fernández puxo o 1-2, Gerardo de novo ampliou a vantaxe no 45 e Carlos Permuy marcou o gol da tranquilidade.
Con este resultado seguen terceiros, buscando achegarse aos dous primeiros postos. Para iso, este sábado ás 9:30 xogarán un partido vital contra o Callobre, cuarto clasificado.
Por último, o Alevín A recuperou postos no playoff de ascenso tras gañar ao Noia por 0-1, co tanto de Iván Vilaseco. A próxima xornada será contra o Crocha, o sábado ás 11h nas Cancelas.
PRÓXIMA XORNADA
Ademais dos partidos xa citados, o xuvenil A enfrontarase ao Santa Mariña, o sábado ás 16h nas Cancelas. O Infantil B enfrontarase ao A Baña, de visitante, o venres ás 19:30. O Alevín B, pola súa banda, xogará contra o Fátima, o sábado ás 10:30 nas Cancelas. Por último, o Benxamín xogará en Villestro contra o Compañía de María, o sábado ás 15:30.
