-
O encontro xogarase o día 25 ás 20h en San Lázaro.
-
A partir das 19:45, os futbolistas do Compos 2017-18 saltarán de un en un para ser presentados ante a afección.
Santiago de Compostela, a 17 de Xullo de 2017.
O Estadio de San Lázaro acollerá o próximo martes 25 de xullo, festividade de Galicia, a partir das 20h, o segundo encontro en memoria do xornalista deportivo Antonio Bermúdez, que enfrontará á S.D. Compostela e ao C.D. Lugo. O partido foi presentado hoxe en rolda de prensa polo alcalde, Martiño Noriega; o presidente do Compostela, Antonio Quinteiro; o director de Relacións Institucionais do club, Ramón Castro, e o fillo do homenaxeado, o tamén xornalista deportivo Toño Bermúdez.
O alcalde mostrou a satisfacción do Concello por poder colaborar nun partido que “permite recordar a Antonio Bermúdez un ano despois do seu falecemento, cando aínda nos sentimos orfos e orfas”. Martiño Noriega incidiu en que o xornalista da Cadea SER “formaba parte do imaxinario deportivo de toda a cidadanía de Santiago, e tiña percorrido miles de quilómetros seguido a traxectoria dos equipos máis emblemáticos da cidade como o Compostela, o Santiago Futsal ou o Obradoiro”.
Tanto o fillo do homenaxeado, Toño Bermúdez, como o presidente da S.D. Compostela, Antonio Quinteiro, incidiron nesa vinculación do xornalista falecido con todo o mundo do deporte, “e en especial co Compos, que foi o equipo do seu corazón”.
Chamamento á asistencia
O II Memorial Antonio Bermúdez celebrarase o 25 de xullo, a partir das 20:00 horas, no estadio de San Lázaro, e enfrontará á S.D. Compostela co C.D. Lugo, equipo da Segunda División Española. As entradas custarán 10 euros para os maiores de idade, 5 para os rapaces de 12 a 17 anos e de balde para os menores de 12 anos e para os socios desta nova tempada. Ademais, o partido servirá para presentar aos xogadores e corpo técnico da tempada 2017/18, polo que os dirixentes recomendan acudir ao Estadio de San Lázaro antes de tempo, xa que sairán ao campo de un en un.
Antonio Quinteiro fixo un chamamento á asistencia ao partido, como mellor maneira de homenaxear a Antonio Bermúdez. Tamén se comprometeu “a darlle continuidade a este memorial ano tras ano, porque o xornalista será parte do Compostela para sempre”.
