Santiago de Compostela, ao 18 de xullo de 2017.
O campo de Conxo foi, esta tarde, o escenario elixido para o comezo da pretempada da nova SD Compostela. O plantel dirixido por Yago Iglesias realizou a súa primeira sesión de adestramentos no campo santiagués, nun día que serviu de toma de contacto para as novas fichaxes.
Os xogadores branquiazuis comezaron a pretempada cunha xornada que serviu para ir recuperando o ton físico. Exercicios de cambios de ritmo, rondos e posesións en espazo reducidos foron os que marcaron a hora e media de adestramento.
Nesta primeira xornada púidose en ver en acción as seis fichaxes xunto aos seus novos compañeiros. Tamén acapararon as cámaras os catro canteiráns que realizarán a pretempada co primeiro equipo. Dos 23 citados, só faltaron Lucas e Samu, aínda de vacacións, mentres que Diego Rey fixo traballo individual para reforzar os xeonllos.
Esta foi a primeira das catro sesións que están programadas para esta primeira semana, todas elas no campo de Conxo e todas á mesma hora, 18:30. Xa na fin de semana, poderase ver en accións aos xogadores na Escravitude, no 50 aniversario da entidade santiaguesa. O encontro amigable enfrontará ao Compos e ao Negreira, ás 19:30.
