-
Os cadetes e benxamíns sacaron mensaxes de apoio por Pablo Barreiro e Isaac, compañeiros lesionados.
Santiago de Compostela, a 6 de Novembro de 2017.
Tres vitorias en nove encontros. Este é a bagaxe das categorías inferiores do Compos nunha fin de semana no que tanto o equipo Cadete como o Benxamín acordáronse dos seus compañeiros Pablo Barreiro e Isaac, respectivamente, con mensaxes de apoio antes do comezo dos seus encontros. Ademais, no apartado deportivo, o Alevín B volveu demostrar o seu gran poderío na liga, na que marcha en segunda posición.
En primeiro lugar, o filial branquiazul volveu á senda do triunfo e fíxoo no derbi contra o Belvís. Nun encontro trabado e con moitas interrupcións, un gol desde fóra da área de Fer Carro no primeiro período foi suficiente para levar os tres puntos. O Zona Vella demostrou a súa gran solidez defensiva durante os 90 minutos, logrando unha importante vitoria que o achega aos primeiros postos.
En categoría xuvenil, o equipo de nacional segue sen romper a súa mala dinámica. Esta vez, na súa visita ao campo do Lourambal, caeu por 3-1 ante o Porriño Industrial. Tras o empate de Yago Torrente no 42, o segundo dos locais na última xogada do primeiro acto fixo moito dano aos branquiazuis, que xa non foron capaces de reaccionar e encaixarían o terceiro mediada a segunda parte.
Do mesmo xeito que os anteriores, o Xuvenil B perdeu o seu partido, nas Cancelas, contra o Oroso, cuarto clasificado, por 0-2. Os santiagueses aguantaron o empate ata a última media hora do encontro, momento no que se adiantarían os visitantes.
En canto ao Cadete, que sacou unha camiseta de apoio por Pablo Barreiro, operado de cúbito e radio esta semana, non puido dedicarlle o triunfo ao seu compañeiro, xa que caeron derrotados por 5-0 ante o Xuventude Oroso. O terceiro clasificado foi superior durante todo o encontro e así o reflicte o resultado final.
O terceiro clasificado da Primeira Infantil Grupo 5, o Bertamiráns, tamén foi o verdugo do Infantil A. Neste caso, o conxunto aurinegro levou os tres puntos das Cancelas tras unha clara vitoria por cero goles a seis.
Mellor sorte correu o Infantil B, que gañou por segunda xornada consecutiva. Os branquiazuis superaron ao Vista Alegre por 5-9, nun partido tolo no que os nosos nunca perderon a vantaxe no marcador desde o minuto un, momento no que chegou o primeiro tanto. Con este resultado, o infantil mantén o quinto posto na clasificación.
En categoría alevín, non houbo dobrete como a semana pasado, pero preto estivo. O equipo A empatou contra o Atlético Fátima a dous goles, na súa visita ao campo Paz Nogueira, mentres que o B goleou ao Vista Alegre por 0-6, triunfo que os mantén na segunda praza da clasificación, antes de descansar a próximo fin de semana.
Por último, o Benxamín, que tamén sacou unha pancarta de apoio ao seu compañeiro Isaac, lesionado nun brazo, perdeu contra o La Salle por 3-1, a pesar de poñerse por diante no marcador no primeiro minuto de xogo.
