-
Xuvenil B, Cadete e Infantil B sumaron os tres puntos.
-
O Infantil B sobe ata a terceira praza de Liga.
-
Descansaron o Alevín B e o Benxamín.
Santiago de Compostela, a 13 de Novembro de 2017.
A xornada das categorías inferiores da SD Compostela deixounos un panorama similar ao vivido a fin de semana anterior, xa que o número de triunfos volveu ser de tres, neste caso, do Xuvenil B ante o Dubra, do Cadete ante a ED Arzúa e do Infantil B contra o Milladoiro.
En primeiro lugar, o filial non puido manter a súa boa dinámica e viuse superado polo Villestro por 1-0, conxunto que o adianta na clasificación.
O xuvenil de Liga Nacional segue en penúltima posición con sete puntos logo de que volvese perder. Os branquiazuis foron superados polo Celta B, segundo clasificado, por 0-2.
Mellor lle foron as cousas ao Xuvenil B e iso que tivo que rozar a épica para levar o partido. Os santiagueses visitaban ao Dubra e comezaron perdendo por tres a cero na primeira metade. Con todo, nun arreón de caste, darían a volta ao encontro cos tantos de Marcos Andrade, Xacobo Insúa, un en propia porta e Schadarac Lonji. Con todo, os locais volverían empatar no 84, pero de novo aparecería Schadarac para marcar o gol da vitoria no minuto 90.
En canto ao Cadete, tras varias semanas de resultados negativos, os canteiráns superaron nas Cancelas ao ED Arzúa por 2-0. Nun partido no que dominaron, levaron os puntos con dous tantos de Hugo Martínez, un na primeira parte e outro na segunda.
En Infantís, o A perdeu 3-0 contra un Conxo que está na parte alta da táboa, mentres que os nosos mantéñense no décimo terceiro lugar.
Mentres, o equipo B goleou por 8-0 ao Milladoiro e ascendeu á terceira posición. Os mozos adestrados por Diego Segade convertéronse nos principais protagonistas da canteira con este gran resultado.
Por último, o Alevín A non foi capaz de superar ao Peleteiro, contra o que caeu por 0-3.
