[cs_video column_size=”1/1″ video_url=”https://youtu.be/jQBlSE5B7yA” video_width=”500″ video_height=”250″][/cs_video]
-
Os branquiazuis queren lograr a sexta vitoria consecutiva.
-
O partido da primeira volta acabou con triunfo santiagués por 3-4.
Santiago de Compostela, a 12 de xaneiro de 2018.
Despois de máis dun mes sen pisalo, a SD Compostela regresa ao seu fortín. Este domingo volverá saltar ao tapete de San Lázaro para enfrontarse ao CD Ribadumia. Mediranse dous conxuntos que practican un fútbol similar e que chegan con boas xeiras de resultados. O Compos pode lograr un récord que data do último ascenso, alcanzando seis vitorias consecutivas, mentres que os aurinegros sacaron os seis últimos puntos, tras superar na Senra ao CD Boiro e á UD Barbadás.
A pesar de ser un dos peores conxuntos de visitantes, o Ribadumia é un conxunto moi perigoso como xa demostrou na primeira volta, cando puxo contra as cordas ao actual líder da clasificación. O duelo terminou con triunfo visitante por 3-4, despois de que Róber desempatase o encontro nos últimos instantes do mesmo.
Esta experiencia leva ao corpo técnico a tomar precaucións de cara ao enfrontamento deste domingo. “É un rival complicado e a pesar da súa clasificación ten moito potencial e as últimas xornadas están a demostralo”, explica Yago Iglesias. Este último aspecto é un condicionante para ter en conta xa que “virán a San Lázaro a realizar o seu partido, a gozar e sen ningunha presión e iso pódelles axudar”.
Segundo o técnico santiagués, o rival é un conxunto que “tenta facer un fútbol alegre e vistoso, con xente no medio de calidade como Fandiño ou Gabi e arriba están pendentes das evolucións de Hugo Soto, un dianteiro contrastado na categoría e que xa nos marcou na Senra”, explicou.
Con todo, o adestrador asegurou que “temos que centrarnos en seguir puntuando de tres, tendo boas sensacións co noso xogo e sobre todo na casa”. Ademais, cita que a emisión do encontro pola TVG2 debe ser un aliciente para os xogadores, aínda que supoña ter que xogar de mañá. “A semana pasada foi moi ben e queremos que este domingo sexa o mesmo. É bonito xogar a esta hora e permítenos ter a tarde libre para ver a outros rivais”, analizou Yago.
Para o encontro, a pesar de que adestrou con todos os efectivos pola semana, non poderá contar con Álex Ares, baixa de última hora por unha amigdalite. O resto esperarán ao domingo para saber se terán a súa oportunidade.
Os once que salten ao campo e os que entren de refresco buscarán esta sexta vitoria para contentar de novo á afección branquiazul. Será un novo reto para estrear o ano no fortín de San Lázaro.
