-
O lateral comenta que a idea é ser, como mínimo, o Compostela de San Lázaro
Santiago de Compostela, a 6 de Xuño de 2018.
A SD Compostela volveu esta tarde ao traballo coa mente posta na final do domingo ás 20.00 horas en San Lázaro. O equipo descansou dous días, os cales lles permitiron descansar a cabeza e encarar con ganas e confianza o duelo contra o Terrassa FC.
“Despois de dous días temos a cabeza limpa. O luns estabamos algo afundidos, pero co paso do tempo os sentimentos tornáronse en esperanza e confianza”, explicou Saro.
O lateral comentou que o outro día afectoulles o estado do terreo de xogo, algo que agora esperan que se reverta. “Estaba moi mal, notábase que tiña moitos anos e moita rodaxe, parece mentira que un campo de tanta capacidade non o arranxen, pero hai que adaptarse ao que nos toca e se a nós nos custou, agora serán eles os que sufran”, analizou.
A principal consecuencia ao cambiar da superficie habitual, segundo Saro, está no cansazo. “O músculo non está adaptado e chegas máis canso ao final do partido”, argumentou. Por esta razón, o equipo sabe que non deben saír como tolos. “Se se pode marcar canto antes, mellor, pero o importante é non encaixar, correr e loitar para que acabe entrando o primeiro”, sinalou.
A idea pasa por ser o Compostela de sempre, pensa Saro. “Debemos xogar, como mínimo, como nos partidos de liga de locais, xa que marcamos moitos goles, encaixamos poucos e xogamos moi ben”, dixo o lateral dereito.
En canto ao árbitro, o santiagués considera que non están a ter sorte e que lles estrañou que o domingo, cometendo moitas menos faltas, levasen máis cartóns. “Parece que non temos a sorte do noso lado, polo que teremos que ir buscala…e o domingo imos a por ela”, sentenciou.
Con este obxectivo, o primeiro paso será encher San Lázaro. “Espero que veña moita afección, necesitamos a súa axuda para que lles fagan sufrir e para que nos dean ese alento necesario cando non esteamos no mellor momento”, finalizou un Saro que desexa que a bancada se encha máis que contra o RCD Espanyol B.
