-
O extremo renova por un ano coa SD Compostela
Santiago de Compostela, a 5 de Xullo de 2018.
Rubén Martínez renova a vinculación da SD Compostela por un ano. O extremo de Catoira seguirá xerando perigo polas bandas de San Lázaro un curso máis, no que tentará dar ese último paso que non acabaron logrando esta tempada pasada.
O xogador de 23 anos, coa firma, cumprirá a súa terceira campaña ás ordes de Yago Iglesias, adestrador que confiou nas súas calidades para fichalo hai dous veráns, procedente do Arosa SC.
Á súa rapidez e as súas capacidades para chegar liña de fondo e centrar, Rubén sumoulle este ano un maior acerto cara a portería rival, logrando cinco tantos ao longo do curso.
Sen dúbida, esta última campaña foi a da consagración para o extremo branquiazul, disputando 27 partidos de liga, 16 deles de titular, e outros catro, todos saíndo de inicio, no playoff de ascenso, no que se destacou polas súas grandes actuacións ante o Terrassa e o Salmantino, sumando unha asistencia no Estadio Helmántico.
Anteriormente, na súa primeira tempada en Santiago, Rubén disputou dezanove encontros, doce de titular, nos que anotou un tanto e xa deu mostras da calidade que atesoura.
A fortuna que lle faltou para que o seu golpeo na final acabase no fondo da rede e non estrelado no traveseiro, espera que lle sorría esta nova campaña para acabar logrando o ansiado ascenso de categoría.
Tras a súa firma, o extremo comentou a súa enorme felicidade de seguir no Compos. “Estou moi contento por seguir un ano máis neste proxecto e espero que esta tempada volvan saír as cousas ben e podamos darlle moitas alegrías á nosa afección, conseguindo os obxectivos marcados”, explicou o extremo.
Con Rubén, o plantel do Compos vai collendo máis forma. Ata a data, son xa catorce os xogadores que teñen contrato coa entidade, con doce que repiten experiencia.
