-
O coruñés asegura na súa presentación que prefire xogar por dentro, na media punta ou un pouco máis atrasado
Santiago de Compostela, a 19 de Xullo de 2018.
Marcos Remeseiro xa está en Santiago para demostrar o seu nivel en San Lázaro. O xogador coruñés leva un mes de vacacións e ten mono de fútbol. Quere volver pisar o verde, axudar ao equipo no que poida e tentar quedar o máis arriba posible.
Con todo, mentres non chega o luns, o media punta foi presentado esta mañá como novo xogador branquiazul nas instalacións da Taberna de San Lázaro, nun acto no que estivo acompañado por Manuel Torres, xerente do local, e Ramón Castro, director das relacións institucionais do club.
Na súa primeira toma de contacto cos medios de comunicación, Marcos declarou que tentará poñer o seu gran de area para que a tempada sexa mellor, se pode ser, que a pasada. “Hai que ser conscientes de que será moi difícil repetir o do curso pasado, ademais hai equipos moi bos como o Racing de Ferrol, pero movémonos ben e creo que seremos moi competitivos”, analiza.
Neste sentido, o novo xogador branquiazul considera que o Compos é, por historia, un club moi grande, polo que ten moita ilusión por facer un bo papel e pelexar por quedar o máis arriba posible. “O ano pasado, cando asinei polo Boiro, a intención era facer un equipo para estar arriba, para loitar por ascender, pero ao final xa se viu que as cousas saíron fatal. Espero que este vaia todo ben e oxalá acabe co equipo en Segunda B”, explica.
Precisamente, ao terminar a tempada pasada no mes de maio, Marcos ten moito mono de xogar ao fútbol. “Acabamos en maio, pero xa viñamos de non competir ben polos problemas económicos, polo que teño ganas de empezar a adestrar, xogar e atopar a miña mellor versión”, asegura nunha mañá na que puido conversar co capitán do equipo, Mon Vives.
Ademais do capitán, Marcos coincidirá tamén, por segunda campaña consecutiva, con Miki Villar, “un rapaz espectacular e gran futbolista, que nos vai a dar moito, sobre todo en velocidade, porque é unha bala”.
Pola súa banda, a nivel persoal, espera estar ao mellor nivel e axudar ao equipo no que poida, aproveitando unhas instalacións que conxugan á perfección coas súas características. “É moi importante para o tipo de fútbol que fai o Compos e no que eu mellor me manexo, o de ter o balón e rasear. Nunhas instalacións así é máis fácil, malia que temos moito que adestrar e traballar”, relata.
Por último, no relativo á súa posición no campo, Remeseiro prefire xogar en posicións interiores, a pesar de que tampouco descarta caer a unha banda. “Sempre fun un xogador de estar por dentro, polo que me sinto máis cómodo na media punta ou un pouco máis atrasado, de medio centro”, finaliza.
