[cs_video column_size=”1/1″ video_url=”https://youtu.be/lTNxmbzwzI4″ video_width=”500″ video_height=”250″][/cs_video]
-
O Compos visita mañá ao Alondras en plena ‘semana de Champions’
Santiago de Compostela, a 8 de Setembro de 2018.
A SD Compostela viviu un inicio ligueiro con dous partidos en San Lázaro por circunstancias puntuais. Dúas vitorias para comezar con gran pé e afrontar con ambición a primeira saída do ano, unha visita ao Alondras CF que se atopa inmersa en plena ‘semana de Champions’ para os nosos.
Co obxectivo de seguir co inmaculado comezo de tempada, ao que se uniu tamén o pase á segunda rolda da Copa do Rey, Yago Iglesias viaxará con todos os xogadores ao 100 % ao campo do Morrazo, un estadio de herba sintética pero que destaca polo seu gran coidado e as súas boas dimensións.
Este encontro chega cun Compos que, debido ao torneo do KO, non puido adestrar como quixera o seu corpo técnico. “Seguimos na liña de pretempada de competir mércores e domingo, polo que onte demos o día libre e a seguinte será distinta tamén para descansar para o que resta de liga”, explicou Yago Iglesias.
Con todo, os branquiazuis terán que mostrar de novo a súa mellor cara se queren superar a un Alondras que non comezou con moi bo pé e que quere asomar a cabeza canto antes. “A pesar de empezar perdendo, ambos pola mínima, son un conxunto moi intenso, sobre todo na súa casa, un campo sintético no que se pode xogar ben, pero no que teñen moito oficio e gol, con xente arriba como Mauro”, analizou o técnico.
O corpo técnico santiagués ten moi claras as armas que presentarán os cangueses, despois de analizalos nas súas dúas primeiras xornadas. “Seguen co mesmo adestrador, polo que manteñen a liña continuísta. Fóronselles dous ou tres xogadores importantes, como Aran, pero tamén fixeron boas fichaxes”, relatou.
Ademais, este ano, os equipos locais motivaranse aínda máis ao medirse ao Compos, xa que son os actuais campións da competición. Así, Yago avisa que hai que ir coas orellas de punta, malia que asegura que ve a todo o equipo metido. Esta concentración demóstrase, por exemplo, en que mantiveron a portería imbatida ata a data. “É unha mostra máis de que imos evolucionando. Seguimos xerando, marcando, pero o manter a meta a cero era unha conta pendente e insistimos moito niso para ser máis compactos e sólidos, a pesar da mocidade dos rapaces”, concluíu o adestrador.
Mercé a esa confianza, o equipo espera seguir coa súa serie inmaculada na liga. Será unha visita complicada, pero os nosos agardan, coa axuda do centenar de afeccionados branquiazuis que se despracen, sacar unha vitoria do campo do Morrazo.
CONVOCATORIA
Lorenzo, Anxo Pérez; Sergio Pereira, Álvaro Casas, David Uña, Piscu, Naveira; Mon, Marcos Remeseiro, Ube; Miki, Josiño, Álex Ares; Brais Abelenda Santi e Aythami.
