-
Yago Iglesias anuncia rotacións para un partido no que saen sen presión
Santiago de Compostela, a 11 de Setembro de 2018.
O soño da Copa do Rey segue vivo na familia compostelanista e esta ilusión trasládase a todos os entes nesta nova rolda do torneo. O equipo viaxa a Lleida sen presión para medirse a un equipo de Segunda División B ante o que tentarán dar a sorpresa. A partir das 20.00 horas, os elixidos loitarán por seguir queimando etapas na peregrinación desta tempada.
A partir das 10.15 horas, os branquiazuis emprenderán “unha viaxe para gozar igual que o de Mensajero”, asegurou Yago Iglesias. Aínda así, advertiu de que cando o árbitro sinale o inicio “imos tentar pasar, sen presión, porque canto menos teñas ao final saen mellor as cousas, e a ver se podemos volver coa eliminatoria pasada, que sería xenial”.
Para iso, o equipo tentará realizar o xogo de sempre, nun escenario totalmente distinto ao dos últimos dous encontros. “É un campo de herba natural de grandísimo nivel e un equipo confeccionado para xogar o playoff de Segunda B, como corrobora a súa terceira posición, con xogadores con moito nome e percorrido”, analizou o técnico.
Ante esta eliminatoria tan ilusionante, malia que sen perder de vista a competición ligueira, o equipo tentará “seguirlle o ritmo ao Lleida Esportiu, ou mesmo marcalo nós, apostando por ter o balón e coa confianza de facer un gran partido”, relatou Yago. O que si ten claro o corpo técnico é que será un novo partido nunha ‘semana de Champions’, polo que haberá moitos cambios no once.
En canto ao rival, o Lleida, explicou o adestrador, “é un equipo que manexa o 4-4-2 ou o 4-1-4-1, gústalle ter a pelota e sabe tamén estar sen ela, malia que entendemos que ao ser nós de menor categoría, tentarán ter a posesión”.
Unha vez empece o encontro ás 20.00 horas, veremos quen consegue levar a batuta. Os nosos, coa ilusión dunha nova experiencia enriquecedora para todos, tentarán lograr a machada e regresar de terras catalás co pase á terceira rolda da Copa do Rey.
