-
O mediocentro, na súa presentación en Laucreaciones, destacou a súa faceta de xogador de equipo
Santiago de Compostela, a 18 de Xullo de 2019
Antes de debutar coa camiseta branquiazul no primeiro amigable da pretempada, Pablo Antas Pereiro viviu a súa posta de longo como xogador da SD Compostela na sede de Laucreaciones, empresa que renovou a súa vinculación co club por oitavo ano consecutivo. No seu acto de presentación, acompañado por Javier Puñal, director de márketing do Compos, e Marcos Sanmartín, xerente da empresa, o mediocentro lucense destacou a súa faceta de xogador de equipo e a ilusión de regresar á Segunda B.
“As ilusións teñen que ser as de crecer todos os anos, polo que creo que o Compos era unha oportunidade boa. É unha institución, pero tamén unha responsabilidade, e creo que todos temos claro cal é o obxectivo”, remarcou na rolda de prensa.
Despois de xogar seis tempadas na división de bronce, Antas desexa regresar á categoría e alongar a súa estancia nela nas filas do Compos, malia que para iso avoga pola prudencia. “O reto é ascender, pero a partir diso temos que ir aos poucos, sendo competitivos en tódolos partidos e así chegarán os resultados”, aclarou.
Con isto en mente, para alcanzar as metas, considera que o plantel debe controlar varios rexistros, sen perder a esencia. “Non temos que enfrascarnos na idea do fútbol que todos recoñecemos do Compos, senón que queremos dar un paso máis, ser capaces de manexar distintos modelos, porque iso faranos crecer como equipo”, explicou.
Nese aspecto, e tralas conversas co corpo técnico e Manuel Castiñeiras, entende que este curso o club ten máis perfís, algún que faltou en campañas pasadas, puntualizando que non veñen substituír a ninguén, senón a achegar. “Creo que todo o mundo que vén chega coa responsabilidade de tentar crecer en base ao Compos”, resumiu.
Entre eses xogadores que chegaron, algún é máis que coñecido. “Na Terceira galega teño moitos amigos, moitas caras coñecidas, e Rodri e Baleato son xa, sen dúbida, amigos de etapas anteriores”, comentou.
No apartado persoal, malia que desexa xogar todos os partidos, sinalou que tentará achegar en todas as facetas que lle toque asumir. “Considérome un xogador de equipo, polo que cando non me toque estar no campo tamén achegarei desde outros puntos de vista”, confesou ante os medios.
Sobre o tapete verde, pode actuar en varias posicións, un rol que dependerá do corpo técnico. “Podo actuar de mediapunta ou de mediocentro. Podo ter protagonismo en ataque, pero son polivalente para moverme na medular”, aclarou.
O que si ten claro é que para el, máis despois de acabar a tempada pasada coa baixa por unha lesión na man, será un privilexio pisar o Vero Boquete, e o seu campo anexo, todas as semanas. “Despois de tanto tempo de caucho, ver este campo alégrache os días”, destacou.
Por tanto, con gañas de coller sensacións e adoptar as ideas de Yago Iglesias, Antas conclúe e desexa unha loita tan bonita en liga como a vivida hai dúas tempadas cando estaba no Bergantiños, na que primen os intereses dos branquiazuis. “Naquel momento dixen que gañara a liga o máis regular, que foi o Compos, e oxalá se repita”, matizou.
Con todo, apuntou tamén os nomes do Fabril, por club, o Choco, que se reforzou moi ben, ou o Arosa, como posibles rivais pola cabeza da táboa, aínda que para chegar aí primeiro céntranse no día a día.
Por outra banda, no acto, Javier Puñal aproveitou a ocasión para trasladarlle agradecemento a Laucreaciones de parte da directiva por seguir pensando no club. Mentres, o dirixente da entidade de impresión en gran formato declarou que é un pracer seguir camiñando da man do Compos e augurou que este será un ano moi especial. “Cumprimos o noso décimo aniversario, polo que cremos que como agasallo, lograremos o ansiado ascenso”, concluíu.
