-
O central primou o proxecto do Compos a outras ofertas de superior categoría
Santiago de Compostela, a 18 de Xullo de 2019.
A sede de Limpezas Salgado, no polígono Novo Milladoiro, acolleu esta tarde a presentación de David Soto González como xogador da SD Compostela. O central, que participou horas máis tarde no seu primeiro adestramento, destacou o proxecto ambicioso branquiazul como vital á hora de tomar a súa decisión.
“Moitas veces non predomina o económico, senón a forma que teñen de explicarche o proxecto e o que che transmiten. Veño a un club serio, ambicioso e iso vale máis que xogar noutra categoría”, sinalou ante os medios de comunicación.
Ademais, o novo futbolista branquiazul mostrouse moi feliz de chegar a un equipo que para el é de superior categoría. “Chego a un club histórico, que ten detrás a unha gran cidade e un gran estadio, polo que estou moi contento de fichar aquí e tentar axudar a lograr o obxectivo do ascenso”, explicou.
Con esa meta na cabeza, Soto espera achegar co seu granciño de area. “A pesar da miña mocidade, teño experiencia no fútbol e vivín situacións moi distintas. Tentarei co meu traballo e as miñas calidades axudar a mellorar e a lograr os resultados”, comentou.
Entre as súas características, o defensa valorou as súas virtudes para manexar o balón cos pés e a súa rapidez. “Un central debe ter liderado, comunicar ben e transmitir seguridade”, resumiu na rolda de prensa.
Outro dos aspectos que valorou Soto son as instalacións, das cales puido gozar esta tarde. “Ten unha pinta espectacular e todo o que sexan medios para adestrar e estar cómodos, benvido sexa”, destacou.
Por todo iso, ten moitas gañas de empezar e desexa que sexa unha vivencia positiva. “O equipo leva varios anos estando en playoff e veremos onde nos pon a liga, pero quedar primeiro é moi importante”, remarcou.
Cos seus compañeiros, dos cales coñece a Mon, Saro ou Antas, de enfrontarse a eles, e a Pato e Álvaro Casas, de xogar xuntos, agarda acabar a tempada celebrando o ansiado ascenso.
