- O avogado santiagués foi elixido de forma unánime
- O novo presidente e a súa xunta directiva comparecerán a semana próxima antes os medios de comunicación
Santiago de Compostela, 30 de setembro de 2022
O avogado compostelán Juan Carlos Rodríguez Gesto é o novo presidente da Sociedade Deportiva Compostela co consenso da totalidade dos socios da entidade.
O novo presidente posúe unha longa traxectoria profesional e leva 6 anos ocupándose da área xurídica do club. Ademais, formou parte da xunta directiva durante os últimos anos, sendo o secretario xeral da mesma.
O apoio mostrado por todos os socios levou ao novo presidente a dar o paso e aceptar a presidencia neste momento, co horizonte temporal de dar estabilidade ao club, continuando o proxecto iniciado fai seis anos e fortalecelo a nivel económico, social e deportivo.
O presidente mostrou a súa intención de trasladarlle o seu proxecto ao conxunto dos abonados o próximo mes de outubro, así como darlle forma á parte económica do club, que garanta o cumprimento dos compromisos e obrigacións contraídas e a continuidade do mesmo.
En canto a área deportiva, o novo presidente móstrase tranquilo coa situación do equipo, e non ten dúbidas sobre o potencial do grupo de xogadores e corpo técnico, reafirmando a súa confianza absoluta no traballo do director deportivo.
Rodríguez Gesto quere seguir potenciando a canteira do club e afirma que para el é innegociable a clara aposta polo fútbol base, que debería ser, na súa opinión, o piar principal do futuro deportivo do Compos.
O novo presidente presentará a súa xunta directiva aos medios de comunicación a próxima semana, pero xa adianta que será unha directiva continuísta. O presidente espera que en próximas datas se poidan facer novas incorporacións.
Javier García continuará como vicepresidente primeiro e será o novo portavoz do club. Carlos Ferreiro seguirá á fronte da parte económica e será o vicepresidente segundo e tesoureiro do Compos. Ademais, Ángel Espadas pasará a ocupar a secretaría xeral do club que deixa vacante o novo presidente.
Ademais, haberá catro vocais. Competerá as áreas de organización e representación a Ramón Castro; económica-financeira a Javier Ferreiro; xurídica e regulamentaria a Ignacio Lorenzo; e incorpórase Lois Rosende, para a atención aos abonados e peñas.
