- O encontro tivo lugar no Hotel Oca Porta do Camino, patrocinador do club
- Os dirixentes mostraron a actualidade do club e responderon as dúbidas dos oitenta afeccionados presentes
Santiago de Compostela, 26 de outubro de 2022
A directiva da SD Compostela celebrou esta tarde, no Hotel Oca Porta do Camino, unha reunión produtiva cos abonados. Uns oitenta afeccionados branquiazuis participaron activamente no encontro, no que se mostrou a actualidade do club, desde diferentes ámbitos: institucional, deportivo e económico.
Co propósito de achegar a entidade aos abonados, a nova directiva presentouse ante os presentes da man do novo presidente, Juan Carlos Rodríguez Gesto, quen fixo balance da xestión desde 2016, en xeral, e desde que comezou a tempada, en particular.
A continuación, o secretario xeral, Ángel Luis Espadas Díez, explicou detalladamente o orzamento, tanto de ingresos como de gastos, desta campaña 2022-23, o cal ascende a un millón trescentos mil euros.
Por último, Javier García, vicepresidente e portavoz da Xunta Directiva, repasou a actualidade deportiva, destacando a aposta que se tomou por futbolistas galegos e da contorna a partir de 2016, así como pola canteira, coa inclusión do filial o curso pasado e o impulso de todas as categorías inferiores, pasando duns cen xogadores a douscentos cincuenta. Así mesmo, destacouse o acordo co Conxo e os convenios asinados con equipos da comarca.
A directiva agradece a todos os asistentes a participación no acto, esperando que servise para achegar o club aos seus seguidores, coa premisa de ser transparentes aos afeccionados.
