- Celebrarase o martes 24, ás 20.45 horas, na Nave de Vidán
Santiago de Compostela, 19 de xaneiro de 2023
Durante este 2023, a Canteira Picheleira segue organizando as súas xornadas formativas sobre o Fútbol Base, a través do seu programa Compos Escola. Nesta ocasión, será David Solleiro Durán o encargado de impartir unha charla, a terceira deste programa, que tratará sobre o adestramento condicional nas categorías inferiores, unha cita que servirá de continuación da realizada, no pasado mes de decembro, por Alexis Padrón.
O evento, aberto a todo o público interesado, celebrarase o vindeiro martes 24 de xaneiro, ás 20.45 horas, na Nave de Vidán, establecemento colaborador do club.
A inscrición para a actividade está aberta a través da seguinte ligazón: https://bit.ly/ComposEscolaSolleiro. Ten un custo de 10€ para o público xeral, 5€ para os adestradores dos clubs conveniados coa Canteira Picheleira e gratuíto para os técnicos dos equipos que forman parte deste programa formativo.
David Solleiro é graduado en Ciencias da Actividade Física e o Deporte pola Universidade de Vigo, conta cun máster en Prevención e Readaptación de Lesións en Fútbol (UCLM), así como un máster en Rendemento Físico e Deportivo (UPO). Ademais, durante a pasada campaña, traballou como preparador físico e readaptador da SD Compostela.
