- O Compos buscará contra o Langreo a segunda vitoria consecutiva en Liga
Santiago de Compostela, 10 de febreiro de 2023
Tras sumar a primeira vitoria da segunda volta na casa, o Compos quere volver iniciar unha xeira positiva de resultados, ao estilo do final da primeira volta, para seguir pelexando polos primeiros postos da táboa. Os nosos mídense mañá ao Langreo, único equipo que os superou no Vero Boquete, coa premisa de sumar de novo os tres puntos. Para o partido, Fabiano espera que o equipo salga metido desde o inicio, porque o considera primordial para conseguir o triunfo.
Estado do plantel. Recuperamos a Darío, adestrou onte e hoxe sen problema, polo que irá ao partido. Allyson aínda ten molestias. Os demais, adestraron ben. Jaime está cada día mellor. Por iso, salvo Allyson, temos a todos. Non temos ningunha sanción, recuperamos a Darío, polo que iremos coa forza máxima cara alá.
Saír con todo. Xogando contra o Compos, un equipo grande da categoría, todo o mundo quere gañarche. Sabendo que no seu campo apertan, que a súa afección tamén o fai, temos que saír como o outro día. Levabamos dous partidos que non estabamos a entrar ben ao partido, pero despois ben, mentres que o domingo pasado entramos ben e foi perfecto. É o que temos que facer. Temos que entrar forte, igualar a súa intensidade, porque así temos moitas posibilidades. Iso é o que quero.
O Langreo. Respecto á primeira volta, teñen outra maneira de iniciar o xogo e outro adestrador. Nós tamén temos outro modelo de xogo, outros xogadores tamén, porque a maioría do partido que xogaron aquí non xogarán mañá. É un partido novo, sabemos dos problemas que nos poden xerar, pero estou confiado de que se entramos forte e ben, podemos ter moitas posibilidades. É un equipo forte, pero tamén teñen algunhas debilidades que tentaremos explotar.
O Novo Ganzábal. É un campo xa antigo, que bota moito o balón, complicado. Temos que adaptarnos canto antes. Onte adestramos en artificial, pero nun novo, que é outro cantar. Non hai escusa, hai que entrar forte, adaptarnos rápido ao partido e tentar propoñer o xogo para conseguir a vitoria.
Solidez do bloque. A xente que está a entrar ten a miña confianza. A pesar de non xogar todos os partidos, son bos xogadores e están adaptados ao sistema. O domingo pasado, dous xogadores de gran importancia para nós, como Antas e Darío, non xogaron e o equipo funcionou ben. Cada día estou máis contento, porque a xente está metida na dinámica do equipo e xogando ou non xogando, todos están a dar o callo, o que é de agradecer.
Jaime Santos. Jaime, loxicamente, non está ao 100%, pero xa está bastante mellor que a semana pasada. Adestrou moi ben, moi adaptado aos seus novos compañeiros e estou contento. Pode ter minutos e oxalá demostre a súa valía.
Un equipo para saír adiante. O importante é que o equipo está adaptado ao sistema, cada día que pasa temos máis seguridade, polo que estou contento. Tan só quería algunha solución, para algunhas posicións, que ás veces non temos porque estamos carentes nelas, pero non pasa nada. Cun ou outro, improvisando, sairemos adiante e estou contento. Non hai que chorar o que non veu, senón fortalecer aos que estamos.
Aplicarse individualmente polo ben do equipo. Ao Compostela téñenlle que doer as derrotas, loxicamente. Pero acórdome que na primeira volta xogamos con Matos, que é xuvenil, Elliot lesionouse ao comezo, non estaba Antas nin outros xogadores importantes. Por tanto, son novos xogadores, novo sistema e non hai desquites. Se miras por desquites, acabas estragando o partido que tes que facer. Tes que estar ordenado, intenso e cada un sabendo o que ten que facer no campo para que as cousas funcionen, individualmente e como equipo. Imos pensando en cada un facer o seu para que o equipo funcione e conseguir a vitoria.
Loita polo primeiro posto. Confío no meu equipo e mentres haxa puntos, traballaremos para conseguir buscar a primeira posición. Despois, se non é posible, non pasa nada. O que si sei é que imos traballar cada día para mirar cara arriba e non cara abaixo.
