- Os abonados adultos poderán sacar entradas adicionais para os partidos contra Arenteiro e Palencia, por 10 euros en total (unha para cada un)
- Pódense retirar, a partir de mañá, na Oficina ou na Tenda Oficial do Compos, e o domingo, no despacho de billetes
Santiago de Compostela, 27 de marzo de 2023
A SD Compostela saca unha nova promoción de entradas para abonados co obxectivo de que, nos dous próximos partidos claves que se disputen no Vero Boquete, o apoio da afección sexa fundamental para sumar seis puntos importantísimos para o obxectivo final. Por 10€, os abonados e abonadas adultos poderán retirar dúas entradas adicionais para os encontros contra o Arenteiro e Palencia (unha para cada día).
Deste xeito, os maiores de idade, co seu abono, ademais de acceder de maneira gratuíta ao Estadio, poderán convidar tamén a familiares ou amigos e pagarán un prezo moi reducido por eles para estes dous partidazos. Non haberá límite máximo, polo que por cada pack de dúas entradas pagará 10 euros (10€ – 2 entradas (unha e unha); 20€ – 4 entradas (dúas e dúas) …).
A promoción estará dispoñible desde mañá martes na Oficina do Club e na Tenda Oficial. Na primeira poderanse retirar no seu horario habitual, de 10.00 a 13.00 e de 16.00 a 20.00 horas, ata o venres; mentres que no establecemento da Rúa da Raíña estarán dispoñibles ata o sábado, de 11.00 a 14.00 e de 17.00 a 20.30 horas.
Así mesmo, o propio domingo, no que cabe lembrar que se levará a cabo unha Fan Zone de CINEMA, con multitude de actividades, música e gastronomía, tamén estará habilitada dita promoción. Así, desde unha hora antes do inicio do duelo, poderanse retirar as entradas coa promoción no despacho de billetes do Estadio.
Con todo iso, o club busca o maior ambiente posible para estes dous partidazos na casa, claves para lograr a clasificación para o playoff de ascenso.
Este domingo, ás 16.45 horas, chega o líder, o Arenteiro, un derbi ao grande, no que se espera a mellor entrada da tempada. Neste auténtico partidazo, que se poderá gozar en familia con todo o programado para a previa e o postpartido, necesitamos recuperar esa unión entre afección e equipo para retomar a senda da vitoria.
Pola súa banda, non será menos clave tampouco o duelo do próximo domingo 16, ás 12.00 horas, contra o Palencia Cristo Atlético, no Vero Boquete de San Lázaro. Serán outros tres puntos cruciais para seguir asentados na zona de promoción de ascenso.
Necesitamos todo o apoio posible para estes próximos partidos. Trae a familiares e amigos e, xuntos, camiñemos cara ao playoff.
