O Compos cae inmerecidamente contra o líder

2 de Abril de 2023
Allyson celebrando o seu primeiro gol co Compos.
Once da SD Compostela contra o Arenteiro.
  • Os branquiazuis adiantáronse, dominaron a contenda en gran parte do encontro, pero acabaron caendo ao final

Santiago de Compostela, 2 de abril de 2023

O Compos non puido sumar contra o líder. Os branquiazuis, a pesar dos seus merecementos, acabaron caendo contra un Arenteiro ao que lle sae todo. Os nosos adiantáronse no marcador, repuxéronse do empate, pero, tras unha segunda parte de dominio compostelanista, a contenda levouna o Arenteiro despois dunha rigorosa expulsión e de dous tantos nos últimos minutos.

Tras unha previa vivida a todo volume, cunha Fan Zone que cumpriu as expectativas, o Compos saltou moi enchufado, cunha marcha máis que o seu rival e iso marcou o que pasou nos primeiros minutos.

O debut de Cardeñosa no banco na casa non puido comezar mellor. No minuto 4, tras un córner que se escapou por moi pouco, nun segundo saque de esquina, chegou o esperado gol. Allyson gañou por arriba o lanzamento de estratexia, tocouna un defensa e a pelota regresoulle ao ariete brasileiro que fusilou a pelota ao fondo da rede.

Tiña o Compos o partido onde quería, pero o Arenteiro deu un paso adiante, demostrou o seu nivel e comezou a merodear a área de Javi Jiménez. O porteiro, de novo no once titular, sacou, por dúas veces, senllos remates en área pequena dos visitantes, o último deles atrapando a pelota na liña.

Con todo, á terceira, o Arenteiro atopou o premio. Un excompostelanista como Jordan Sánchez realizou unha extraordinaria xogada en banda dereita, marchándose de varios rivais e pondo un centro raso perfecto que empalou, de primeiras, Escobar, 1-1.

Coas táboas no marcador, os nosos volveron recoller a batuta do encontro, capaces de ter a posesión, mover ao rival, aínda que sen profundidade. Por iso, chegouse ao intermedio co empate citado.

Á volta dos vestiarios, calcando o arranque do partido, o Compos, con Cano de referencia, volveu saír dominador. Poboando o centro do campo, os branquiazuis conseguiron acantoar ao Arenteiro, manexando a pelota en zonas de perigo. A pesar de todo, e á rapidez de movementos coa pelota, faltaba algo de claridade nos últimos metros.

Deste xeito, xa con Elliot sobre o verde, tería a súa opción o Compos cun disparo de Martín que atrapou en dous tempos Diego.

Xogábase ao que quería o Compos e estaba todo controlado, con todo, nunha acción moi polémica, no minuto 79, o colexiado decidiu sacar a segunda amarela a Roque. O lateral, que acababa de recibir a primeira, gañou o esférico nun duelo polo chan, pero o árbitro decidiu decretar falta e non só iso, xa que o expulsou.

Cun máis sobre o campo, o Arenteiro non conseguía xerar aparente perigo, aínda que, nunha nova mostra da súa efectividade, atopou outro gol no 87. Co balón no balcón da área, Manín recibiu ás costas da zaga e cruzouna ao segundo pau para que Escobar, só, só tivese que empuxala á rede.

Non se veu abaixo o Compos que tentou reporse e buscar o tanto á desesperada. Probouno Elliot, no 89, cun disparo axustado que se escapou por moi pouco. E xa no desconto, a máis clara. Centro perfecto ao segundo pau do canario, toque de Cano para pola na área pequena e Darío, chegando de socato, non conseguiu conectar coa pelota, cando tiña todo para marcar. Un defensor quitoulla no último segundo, impedindo o remate do dianteiro.

E do que puido ser o empate, pasouse ao 1-3. Tras o saque de esquina desa acción, perdeuna o Compos, arrincou a moto Joseca e cedeuna para Ger, no man a man, para que marcase a portaría baleira.

Por tanto, o partido acabouse con esa acción e os puntos marcháronse para un Arenteiro ao que lle sae absolutamente todo. Derrota inxusta para o nivel mostrado polos nosos. Tocará reporse, seguir traballando duro e encarar, o vindeiro domingo, outro duelo clave contra o Real Avilés Industrial.

FICHA TÉCNICA

1- SD COMPOSTELA: Javi Jiménez; Roque, Álvaro Casas, Pablo Crespo, Martín; Samu, Pablo Antas; Parapar (Darío, m.86), Jordan (Elliot, m.67), Mario Rodríguez (Riki Mangana, m.83); e Allyson (Cano, m.46).

3- CD ARENTEIRO: Diego García; Jordan, Ger, Pol Bueso (Vitra, m.71), Joseca; Adrián Cruz, Álex Fernández; Pibe (Rafa Mella, m.85), Curro (Marquitos, m.71), Romay (Manín, m.80); e Escobar.

GOLES: 1-0: Allyson, min.4; 1-1: Escobar, min.22; 1-2: Escobar, min.87; 1-3: Ger, min.90+4.

ÁRBITRO: Crespo Puente (Cantabria). Expulsou a Roque (m.79), por dobre amarela. Ademais, amoestou a Allyson e Pablo Crespo, polo Compos; e a Álex Fernández e Escobar, polo Arenteiro.

INCIDENCIAS: Estadio Verónica Boquete de San Lázaro (Santiago de Compostela). Xornada 28 do Grupo 1 da Segunda RFEF disputada ante 2.712 espectadores. Antes do encontro celebrouse unha Fan Zone con orquestra, polbo e moitas actividades, nas que participaron centenares de afeccionados de ambos equipos.

Youtube

Instagram Compos

Flickr Amadeo Rey

  • COMPOSTELA- 3 AVILES- 1
  • COMPOSTELA- 3 AVILES- 1
  • COMPOSTELA- 3 AVILES- 1
  • COMPOSTELA- 3 AVILES- 1
  • COMPOSTELA- 3 AVILES- 1
  • COMPOSTELA- 3 AVILES- 1

Instagram Canteira

Twitter Canteira

Facebook

7 hours ago

SD Compostela
🙌 𝐅𝐈𝐂𝐇𝐀𝐗𝐄 🩵🤍💪 Santi de Prado está de volta! A SD Compostela 24.25 refórzase cun correcamiños para a banda⚽️ Regresa ao Compos para seguir co seu crecemento tras unha sensacional campaña na UD Ourense 𝐒𝐚𝐧𝐭𝐢 𝐝𝐞 𝐏𝐫𝐚𝐝𝐨 🩵🤍✍️ sdcompostela.com/2024/06/20/santi-de-prado-fichaje-sd-compostela/#benvidosantideprado ... See MoreSee Less
Ver en Facebook

1 day ago

SD Compostela
🙌 𝐑𝐄𝐍𝐎𝐕𝐀𝐂𝐈𝐎́𝐍 🩵🤍💪 Gonzalo Landeira ascende ao primeiro plantel do Compos para a Tempada 24.25⚽️ O mediocentro da Canteira Picheleira amplía tamén o seu contrato ata 2025𝐋𝐚𝐧𝐝𝐞𝐢𝐫𝐚 🩵🤍✍️ sdcompostela.com/2024/06/19/landeira-canteira-picheleira-compos/#gonzalolandeira2025 ... See MoreSee Less
Ver en Facebook

2 days ago

SD Compostela
🙌 𝐅𝐈𝐂𝐇𝐀𝐗𝐄 🩵🤍💪 Rabanillo, un seguro baixo paus para a portería da SD Compostela ⚽️ O experimentado porteiro, que ven de realizar un gran ano no Club Deportivo Guijuelo, firma por unha tempada𝐑𝐚𝐛𝐚𝐧𝐢𝐥𝐥𝐨 🩵🤍✍️ sdcompostela.com/2024/06/18/rabanillo-fichaje-portero-compos-2425/#benvidorabanillo ... See MoreSee Less
Ver en Facebook

3 days ago

SD Compostela
🙌 𝐅𝐈𝐂𝐇𝐀𝐗𝐄 🩵🤍💪 Manu Rivas regresa ao Compos para a Tempada 24.25⚽️ O canteirán branquiazul seguirá coa súa gran proxección no Compos tras destacar no Atlético Arteixo𝐌𝐚𝐧𝐮 𝐑𝐢𝐯𝐚𝐬 🩵🤍✍️ sdcompostela.com/2024/06/17/manu-rivas-canterano-vuelve-compos/#benvidomanurivas ... See MoreSee Less
Ver en Facebook

5 days ago

SD Compostela
🙌 DOUS DOS NOSOS 🩵🤍💪 Álvaro Casas e Pablo Antas seguirán na Tempada 24.25⚽️ Será a 8ª e 6ª campaña, respectivamente, dos dous capitáns do Compos ✍️ sdcompostela.com/2024/06/15/alvaro-casas-pablo-antas-compos-2025/#álvarocasas2025 #pabloantas2025 ... See MoreSee Less
Ver en Facebook

All contents © copyright SD Compostela. All rights reserved.