-
Manel Menéndez firma polo Compos tras tres grandes campañas no Marino de Luanco
Santiago de Compostela, 2 de xuño de 2023
José Manuel Menéndez Erimia (Avilés, 07/01/1971) é o novo adestrador da SD Compostela para a Tempada 2023/24. O técnico avilesino, gran coñecedor da categoría e con pasado no fútbol profesional como futbolista, firma por unha tempada no club branquiazul. Chega ao Compos tras tres grandes campañas no Marino de Luanco, nas que o seu equipo logrou os seus obxectivos mostrando un gran nivel de xogo.
Manel Menéndez é un técnico novo, que conseguiu deixar o seu sinal alá por onde pasou. Especialmente destacable foi o seu rendemento no Marino de Luanco as tres últimas tempadas, desenvolvendo un nivel futbolístico moi alto, nun equipo con selo propio, destacando a súa capacidade para competir en calquera campo cun fútbol moi vistoso.
Na súa etapa como futbolista, comezou a súa carreira no equipo da súa cidade natal, o Avilés. Tras destacar na súa casa, pasou polas filas do Real Oviedo, onde xogou no seu filial, antes de debutar e facerse un oco no primeiro equipo ovetense. Despois do seu gran rendemento no Oviedo, ficharía en 1999 no Deportivo, conxunto co que lograría o título de liga.
Despois deste éxito, continuaría a súa carreira futbolística no Numancia, Tenerife, Real Oviedo, Hannover 96 (Alemaña), Cidade de Murcia e Eibar, conxunto no que colgaría as botas en 2008, con 493 partidos oficiais ás súas costas, 234 deles na Primeira División.
Como adestrador, Manel Menéndez comezou a súa etapa de técnico igual que como xogador, na súa casa, no Real Avilés. No fútbol base asturiano arrincou a súa carreira como adestrador, pasando polas canteiras dos principais equipos da comunidade, así como pola Selección Asturiana. Daría o salto as categorías sénior no Marino de Luanco, en Terceira División, pasando posteriormente polo CD Praviano e CD Mosconia, tamén no grupo 2 da Terceira División asturiana.
Tras dúas campañas, regresaría ao cargo de primeiro adestrador do Marino de Luanco, levando ao equipo asturiano, en tres grandes campañas, a lograr os seus obxectivos.
No seu primeiro ano, o da pandemia, nunha liga moi complicada, conseguiu clasificar ao Marino para a fase intermedia, na que se mediu ao Compos, empatando en Miramar e gañando no Vero Boquete. Ao curso seguinte, en Segunda RFEF, lograría a salvación co conxunto asturiano, unha tempada na que volveu enfrontarse á SD Compostela, conseguindo unha vitoria en Asturias e un empate en Santiago.
E esta pasada tempada, tamén na Segunda RFEF, conseguiu salvar a categoría con folgura, estando mesmo próximo do playoff de ascenso. Nos partidos disputados contra a SD Compostela logrou senllos empates a un tanto, o último deles, na última xornada de liga.
Coa súa fichaxe como adestrador, a SD Compostela comeza a súa preparación para a Tempada 2023/24. O adestrador avilesino dirixirá ao equipo branquiazul cun obxectivo, loitar polo ascenso a Primeira RFEF.
Benvido a Compostela, Manel!
