-
A primeira edición do Torneo F8 CC As Cancelas foi un éxito, con bancadas cheas e preto de 300 nenos e nenas participando
Santiago de Compostela, 19 de xuño de 2023
A primeira edición do Torneo F8 CC As Cancelas deixounos unha gran xornada de fútbol e diversión. Preto de 300 nenos e nenas puideron participar nesta competición organizada pola Canteira Picheleira, para categoría Benxamín e Prebenxamín, con moitas novidades, para o desfrute dos protagonistas do día: os pequenos futbolistas.
Durante toda a xornada, viviuse un auténtico ambientazo. As bancadas do campo municipal estiveron cheas desde primeira hora, pero tamén se desprazaron moitos afeccionados ata o aparcadoiro do Centro Comercial, onde se disputou o novo formato do 2×2.
Sen dúbida, foi un evento deportivo único para os participantes, unha cita que non sería posible sen o apoio de As Cancelas. O patrocinador do Torneo colaborou intensamente coa organización, cedendo parte da súa zona exterior para a citada actividade do 2×2, pero tamén acolléndonos na Casa de Celi durante a recollida dos trofeos.
Unha gran xornada para todos
No aspecto deportivo, como principal novidade, houbo tres gañadores diferentes por categoría, en función dos resultados da fase de grupos. Así, tanto en categoría Benxamín como en Prebenxamín, houbo un campión da Fase Ouro, outro da Fase Prata e un terceiro da Fase Bronce.
Na categoría Benxamín, o gañador da Fase Ouro foi a SD Compostela, tras superar nunha gran final ao CD Conxo Santiago B. Pola súa banda, a EF Luís Calvo foi o gañador da Fase Prata e a SD Esteirana, da Fase Bronce.
E en categoría Prebenxamín, o gañador da Fase Ouro foi o CD Conxo Santiago, superando na final á SD Compostela. O CD Conxo Santiago B proclamouse vencedor da Fase Prata e o ED Xuventude Oroso da Fase Bronce.
Todos eles recolleron os seus recoñecementos na planta superior do Centro Comercial As Cancelas, onde puideron pechar, nun ambiente lúdico e festivo, unha gran xornada de fútbol e diversión.
